成功需父幹？英國嘅財政研究所同哈佛及劍橋學者做咗個橫跨十幾年研究，篇論文嘅結論係，識投胎原來真係有錢途嘅。現實真係太殘酷？係o架！
呢四位學者研究咗超過26萬名一九九九年入大學嘅當地大學生，發現佢哋喺畢業10年後（即是二○一二至二○一三年度），出身高收入家庭嗰啲，年薪多過出身低收入家庭嗰啲一大截。差距有幾大？男嘅平均差8,000英鎊（約8.83萬港元），女嘅5,300英鎊（約5.85萬港元）。
即使撇除主修科同埋大學等因素，有米屋企出身嘅大學生畢業10年之後，薪酬較一般人高出10%。點解特登要睇10年？原來係想話，家庭出身嘅影響會維持好一段時間。
點解有錢仔女搵銀多過人？呢幾位學者就話，唔單止因為父母可以畀多啲錢幫佢哋發展，仲有就係有錢仔女嘅「文化及社會資本」多啲厚啲。
即係乜嘢？人脈囉，有多啲Uncle、Auntie關照住，可以去三五七間大機構實習之類啦。至於出身寒微家庭嗰啲畢業生，或多或少會遭人白眼。
不過，計絲絲話，與其葡萄，不如疊埋心水努力靠自己，造福吓自己仔女都好。
余絲韻