內地三月CPI低於預期，內地網民揶揄統計局官員食的豬肉同菜價都比一般平民百姓便宜！正正由於呢兩個月CPI數據都受豬價同菜價左右，並未能反映真實情況，看來以此來判斷人行動向，有點困難。
昨日醫療股為市場焦點，鳳凰醫療（01515）宣布收購華潤醫療旗下主要醫院資產，包括35家醫院、3家養老機構等，年收入約24億元人民幣，完成後將成為內地最大醫院集團，而代價將按每股8.04元向華潤醫療發行4.63億股代價股支付，變相引入華潤醫療成控股股東，公司會易名為「華潤鳳凰醫療集團」。
呢單刁帶來的訊息是，內地公共醫療改革持續推進，大方向不會改變，央企開始利用上市平台，重組醫療相關資源，以便日後在股市融資加快併購壯大，而隨着龍頭企業開始加快併購動作，將帶動行業投資和估值上升，板塊有望繼續「吸金」，大有大炒，細有細炒。
鳳醫今鋪名副其實係飛上枝頭，昨日復牌急升近兩成，收報10.9元，成交3.82億元，投行德銀睇13元，里昂睇14元，大摩睇20元。筆者相信班芬佬要揸內地醫藥股的話，已泊華潤碼頭的鳳醫，將成為必選之一。
不過，考慮到市況因素，唔建議投資者高追，會待回試10元邊或樓下，再分注作中長線收集。
司慕渢