絲絲講場：Hack電郵有市價 驚未？
搵黑客Hack人嘢要使幾多錢？原來Hack人家個人Gmail，大概1,000蚊港紙就搞掂，與Hack人哋個facebook同價，入侵企業電郵帳戶直頭唔使4,000蚊！絲絲好驚！啲地下嘢竟然咁公開？
信用卡資料嗌貴75%
話說，美國電腦公司戴爾（Dell）年年都出份《地下黑客市場研究報告》，佢哋真係搵人Check住黑客個市。今年份報告顯示，原來唔見得光嘅地下市場，近年啲嘢一樣貴晒，好似盜取信用卡資料咁，一四年基本收費係每張卡大概31港元，最近市價已經升到55港元！加咗75%！
啲黑客接嘅Job，除咗入侵電腦同埋偷資料外，仲可以提供「假」身份資料套餐同實體假證件咁。報告仲話，黑客今年提升咗服務質素，連周末都肯接Job，甚至搞宣傳話24小時服務添。
話時話，若然閣下真係幫襯黑客，Hack生意競爭對手啲料返嚟，驚唔驚個黑客轉頭將閣下啲料賣返畀個生意對手賺多筆！所以，有啲嘢，都係唔碰為妙。
余絲韻