絲絲講場：《太陽的後裔》煲起愛奇藝
《太陽的後裔》大結局？呢個星期四先知。至於簽咗呢套韓劇中、台獨家播放權嘅愛奇藝，就係人都睇到佢何止前途一片光明，直頭係起死回生，一套韓劇就煲起愛奇藝估值。
私有化價格或提高
話說，之前大摩報告話，參考舊年第2季與第3季，照睇愛奇藝目前平均季度虧損成6.46億元人民幣。不過，條數係未簽《太陽的後裔》中、台獨家播放權之前嘅事，依家套劇熱爆到咁，視頻廣告連埋愛奇藝商城嗰套劇商品收入等，愛奇藝今年錢途絕對一片光明，隨時虧轉盈。
愛奇藝喺二月底開始與南韓同步直播套劇之前，母企百度董事長李彥宏同愛奇藝CEO龔宇已提出私有化愛奇藝建議，打算最快3年後喺內地上市，當時估值大概28億美元（約218.4億港元）。不過依家得《太陽的後裔》帶挈，氣勢銳不可當到咁，私有化價格睇嚟隨時有可能要提高，有望直逼優酷土豆市值45億美元。所以話，團結，就是錢！
余絲韻