絲絲講場：證監主席畀家用逐星期計

證監會主席唐家成，佢自爆結婚咁多年，都係每個星期畀家用老婆，仲話「用完就無o架喇！」唔止咁，佢仲有本帳簿，Mark低晒啲收入同支出。

留學無錢買杧果

佢又提到自己1971年喺英國讀書時，每個月屋企畀50鎊，交租已經用咗30鎊，結果每個星期剩番5鎊食同用，手緊到呢，連想食個杧果都無錢，所以依家學生幾幸福咁話。咁佢自己啲仔女呢？佢話仔女出國留學前，佢都無畀信用卡佢哋。

「錢家有道」教理財

點解佢出嚟講呢啲？話說，證監會旗下「投資者教育中心」（IEC）尋日推出全新金融理財教育平台「錢家有道」，佢哋設計咗7個「人物」，組成一個家庭叫「錢家」。點解「人物」有引號？因為除咗錢家六口三代人外，仲有一隻貓，都係家庭成員。IEC總經理李博衛（David Kneebone）自己就最鍾意隻貓，佢仲預告嚟緊會有更多人物出場，例如理財策略師咁。

IEC企業傳訊主管郭麗賢就話，會請「柳爺」柳俊江做「錢家作客」傾吓理財心得，仲有「錢家信箱」、教育專車落區，錢家仲會一家大細落旺區跳舞添。

話時話，逐星期畀家用，會計師出身先會咁？絲絲識得嗰啲，係每月將成份糧先交晒畀太太，然後再問番太太攞零用。咁嘅好好先生係邊位？邊度搵？你估吓。

余絲韻