北水頭等倉：金隅破位有力再上

講開又講，留意到昨日多咗創業板股異動，係唔係北水重臨香江的先兆，只能做事後孔明。不過，睇見昨日主板成交得582億元，唔多開胃，係咪應該趁大市仲未大起步買港交所（00388），真係見仁見智。筆者看法都係偏向謹慎，先行觀望。

充電樁股選擇少

昨日兩地股市有一個板塊表現特別亮麗，就係充電樁股。事緣國家電網啟動首輪充電樁招標，刺激電池及充電樁股表現。港股中業務有涉獵充電樁的，有跟開本欄的都知來來去去主要得隻泰坦能源（02188），昨日股價一度高見1.5元，收報1.49元，升幅13.7%，成交3,544萬元。

電池股天能動力（00819）破頂，即市高位見7.5元，最終收報7.42元，升1.2%；另昨日提及表現落後的超威（00951）則升10.6%，收報5.31元，由於以大成交突破阻力位，相信可如期挑戰5.6元阻力。

繼續睇下破位股，見到金隅股份（02009）昨成功突破6元大關，並一舉突破250日線，升6.2%收報6.27元。主要係公司披露，控股股東金隅集團通知，為深入貫徹落實國家京津冀協同發展的戰略部署，與唐山市政府國有資產監督管理委員會正在籌劃戰略合作，消息惹來注資憧憬。

純睇走勢，短線回吐守得住5.8至6元支持區的話，整固過後應可保持反覆向上格局，不妨留意操作空間。

司慕渢