Market Insight：飛機租賃回報吸引

美元走勢對企業盈利影響毋庸多言，甚至H&M首季盈利大幅倒退三成，亦歸咎為美元強勢拖累成本上漲。惟美元近期轉弱，則令日本相當頭痕，安倍晉三叫各國應避免任意干預匯率市場，有賊喊捉賊之嫌。自己幾支箭射完，但日圓因避險情緒升溫而由貶轉升，所以期望其他國家高抬貴手，否則靠出口食胡的日本最大鑊。

滙控（00005）再創三年多新低，8厘幾息都難令股東回心轉意。「魔笛」吹到「最熊」可見28蚊，豈非到時有十幾厘息？所謂最熊，即油價可能低見20美金，滙控較現價再跌38%並不算過分，大摩估計恒指最差見14,000點，其實論跌幅亦差不多，所以滙控「新目標價」並無太大新意。

收息需求從未減退

有人認為，歐洲一日不撤負利率，銀行股亦難有大起色，但油價已擺脫低位，那些洗錢逃稅及罰款等指控已曠日持久。滙控屬於超賣，但問題是值博率亦不高，就算升到50蚊附近已大把蟹貨，只啱一批「食息一族」。

穩健型股份其實不少，泓富（00808）和陽光房託（00435）兩隻REITs不斷創下52周新高，證明收息需求仍然相當龐大。超低息環境造就回報率穩定之股份一直跑贏大市，中電（00002）、電能（00006）及長建（01038）等是明顯例子。風電和太陽能發電股靠政府補貼電價亦有頗高回報，但有減電價和降補貼風險。

近年飛機租賃行業亦相當蓬勃，皆因借錢買飛機之利息成本降低，然後將飛機出租予航空公司，條數好易計：（租金回報－利息成本－折舊開支），便可得出大約回報率。

中國飛機租賃（01848）昨公布出售飛機拆解中心權益，股價亦隨即升達6.4%收報7.99元。一架飛機可以用好多年，用完後又可拆解賣零件收回一筆，形成一條龍產業鏈。集團賣拆解中心，無非是認為短線專心做飛機租賃生意更好搵。

當歐債成負利率，美國十年期國債孳息得1.7厘多啲，現在無疑是回報鬥低的時代。不過，正因回報有一定吸引力，近年不少內地公司加入飛機租賃市場，競爭加劇之後可能會影響回報率。內地最大的飛機租賃公司中銀航空租賃，如無意外將於今年在香港上市，並成為今年集資巨無霸之一，屆時投資者可以多一個選擇。

飛機租賃股價從低位已累升五成，但市值規模小得多，待中銀租賃上市時無疑有影子股概念，但亦要視乎對方估值，因基金通常「要大唔要細」，所以炒影子股亦要識走位。

舜宇VR概念待發揮

手機設備股昨個別發展，最有睇頭莫過於舜宇光學（02382），喺大成交配合下，以大陽燭升穿10日線，即市曾創25.65元的上市新高，收報24.25元，升13%。舜宇上月公布一五年度業績，純利按年增長34.5%至7.62億元人仔，手機及車載鏡頭都有穩定增長。

績後獲多間大行唱好，最牛係麥格理，睇32元。一個星期後，股價出現突破，升到上24.15元，事隔兩個星期左右，昨日又再破頂。股價短期內調整仍可守喺10日線22.2元樓上，有機會更上一層樓。

蘋果公司出咗iPhone SE，由於欠驚喜，各概念股當時都炒唔起，近日亦有報道話新機首周銷量不佳，其實應該係預計之內，但相信市場對iPhone 7的憧憬仍然未減，到時又會有一番炒作。

同時，舜宇亦是虛擬實境（VR）概念股，有多一個炒上因素，集團現時為Oculus Rift及HTC提供鏡頭，虛擬實境產品興起，對集團有利。

古勝