絲絲講場：14奇怪職業勁搵銀

1. 最Pro擁抱員

賣身？冇錯，兼要畀人攬、同人瞓。但唔好諗歪，純粹好專業咁畀顧客當「攬枕」，等顧客感受吓人間溫暖咁，絕無其他。攬還攬，事先會講明絕對唔可以亂碰身體部位（簡單講，同對待小朋友一樣，有啲地方唔可以亂碰）。

呢檔生意係個30歲美國女人諗出嚟，時薪600幾港元，可以月入近6萬，好搵過佢以前做客戶服務代表同健身教練好多。瞓住賺好Easy？未必，事關好多「枕邊人」愛講心事，令擁抱員有心理負擔。乜人幫襯？九成係男人，20到75歲都有。

2. 職業姊妹團

美國紐約有女人開公司「出租」自己幫人搞結婚，由度演詞、計Budget、整To-do List、安排一切、甚至真係到場做埋姊妹幫手都得。「出租」一次，收費閒閒哋16,000港元。

3. 專業送殯員

紅事可以「租」姊妹，白事一樣可以「租」人扶靈。英國有公司專門出租送殯員出席葬禮、悼念死者。每兩個鐘收500幾港元，生意旺嗰時，每人月賺過4萬港元。

4. 骨灰手工藝

骨灰除咗可以整鑽石留念，喺美國仲可以整玻璃雕塑、水晶球、頸鏈等，都係靠骨灰工藝師。

5. 口臭評估員

佢哋每日要用鼻去聞測試者個口，睇吓啲產品除唔除到口臭，各大口腔潔淨產品同香口膠公司專請。

6. 測面部膚感

佢哋負責用手摸吓測試者塊面，睇吓各大護膚品、甚至剃刀嘅效用。要受過訓練，只得兼職，時薪大概200港元。

7. 睇電視搵片

任務係喺各大電視頻道搵有用嘅片段出嚟。乜人會請？美國名咀會，聽講周薪近5,000港元。

8. 職業排隊黨

即是專排隊炒黃牛嘅職業人，邊度有嘢炒，邊到有佢。

9. 試狗糧乜味

寵物飼料公司專請佢哋，負責為貓糧狗糧試味。同試酒一樣，嗒一嗒，唔吞落肚嘅。

10. 教狗隻滑浪

美國加州聖迭戈有專教狗狗滑浪嘅教練，每堂包埋滑浪板同狗狗救生衣。香港未見有，肯定有Market，不妨諗諗。

11. 分雞仔公乸

負責分初生雞仔性別，要受訓3年。點分？睇Pat Pat同睇翼形，每小時要分到700隻，要98%準，月薪近4萬港元，英國同日本嘅商業孵化場好搶手。

12. 擠生蛇毒液

佢哋徒手採集蛇嘅毒液，係世上最危險嘅工作之一。靠咩發達？佢哋主要向醫療或科研機構賣蛇毒，每克可以賣到成7,800港元。（每克計，黃金依家都係賣緊300幾港元到咋）

13.除冰巡邏隊

將冰山劈開？未至於。呢隊因鐵達尼號沉沒而誕生嘅國際海冰巡邏隊，專責追蹤啲對船隻有危險嘅冰塊，拖離航道。

14. 度幸運金句

幸運曲奇入面啲金句點嚟？總要有人寫。喺美國寫呢啲，月薪折合港元都有近3萬！

余絲韻