絲絲講場：大摩教炒：今年要學「小強」

「小強」者，「曱甴」也，文雅啲叫「蟑螂」。

話說，摩根士丹利首席美股策略師Adam Parker早排向啲客出報告話，即使二月嗰時大家對大市睇法好牛，但佢認為標指升至現水平已見頂，佢又唔明點解大市咁波動下，竟然仲有人睇可以再牛？

要識跟風保命仔

咁嘅時勢，點賺錢先？Parker教路話，要做曱甴！曱甴之所以能生存，係因為適應力強，強到就算剢甩咗個頭，都仲可以生存多幾星期！（絲絲雖則知「小強」有幾乎不死身，但都只係「幾乎」，未見識甩咗頭仲可以……）

Parker仲話，曱甴特性係隨住風向而遊走（遊走者，即係飛囉！實情絲絲一路寫一路打冷震），風向改變，佢哋亦會跟住轉向以保命。

即係點？Parker話，大市喺第二季隨時轉向，所以最佳投資策略係學「小強」一味要順勢；不過佢又補句話，遇上啲風一時左邊來一時右邊去，未搞清是否真轉向時，「小強」會等，但投資者未必等得切，事關大家只係人一個，邊得「小強」咁有經驗咁話。

Parker建議一向玄

講咗等於冇講？係嘅，Parker咁都唔係第一次。話說佢二月時亦講過，佢條Team畀出嘅投資建議，如果啲客買相反就有賺！

話時話，絲絲未見識過本地「小強」會「隨風向而遊走」，唔知「小強」有冇土炮與來路之分？美股與港股就一定有，都未計內地A股。

余絲韻