有日，有個人揸住一大袋現金，就咁行入間滙控（00005）旗下分行，話啲錢係佢養蝦賺到嘅，要即刻開個私人理財戶口。
養蝦賺到？唔係話唔得，不過嗰個人得19歲，嗰度仲要係出晒名多毒犯洗黑錢嘅墨西哥！係唔係要Check真啲呢。
所以有外國媒體報道，滙控畀啲獨立監管機構插話佢一二年畀美國罰完錢都未識驚，呢幾年防洗黑錢嘅措施仲係好兒戲。
呢個咁有睇戲Feel嘅真實個案，發生喺墨西哥錫那羅亞州，嗰度出名毒犯多，但當地滙控旗下職員似乎唔多懷疑，仲好快手開戶。
仲未止，聽聞滙控旗下有個客又有個客話自己專做迷你裙出入口嘅，由巴西運去伊朗！喺伊朗，着迷你裙唔係話唔得，屋企着冇嘢嘅，出街着犯法咁啫。呢類惹人遐想個案，要數仲有得數落去！
一二年滙控畀人罰錢之餘，仲需要「守行為」五年，如果期間銀行盡職反洗黑錢就會無事；但若然辦事不力，最嚴重會吊銷集團嘅美國銀行牌照，都咪話唔驚。
余絲韻