絲絲講場：浙行津行「緣」來是冤家

被問到同浙商銀行「修得同船渡」，天津銀行執行董事兼董事長袁福華話，大家不約而同一齊嚟香港上市，唔單止係緣分，更係心有靈犀，幾咁感性。

兩行有緣「三撞」

其實兩間城商行有緣嘅，絕對唔止係撞期上市咁簡單，佢哋之前仲一齊認購不足，話說天津銀行公開發售認購僅錄7.76%，而浙商銀行就有56%。

緣分要嚟，真係擋唔住，由兩間城商行嘅股價表現就可以見到，雖然上市首日股價稍有上落，但兜兜轉轉一輪，收市價最終一齊險守招股價！有緣到呢……

認購不足 一樣寸嘴

不過當浙商銀行執行董事兼董事長沈仁康被問到未足額認購時，佢就話得56%認購唔算好滿意，「但跟同期上市同業對比，算OK。」咦？言下之意，暗寸緊難得同船渡嘅天津銀行？會唔會係絲絲聽多咗呢可。

余絲韻