投資U WIN：穿梭虛實炒幣 後生仔狂賺

樹仁Harvey：通頂「採礦」飲頭啖湯

樹仁大學工商管理學系二年級生Harvey早在中學階段已涉獵Bitcoin。當時Bitcoin還未興起，他偶爾在一個外國論壇上，聽到Bitcoin這類新奇有趣的虛擬貨幣，便上網了解，更很快被它的投資潛力所吸引。「上網自學程式語言挖Bitcoin，無咩成本，但又可以賺錢，真係唔錯！」他當時真的着迷，為上網研究挖礦技術，不惜捱夜至早上四時，然後於六時上學。

學生玩Bitcoin皮費輕

虛擬貨幣的價值及炒作性往往受質疑，但Harvey指有危就有機，早料Bitcoin炒得起。「喺電腦技術愛好者嘅角度，Bitcoin係一個創新；喺經濟學家角度，佢係人類史上出現過最完美嘅貨幣；喺投資者角度，佢係潛在筍盤。」Harvey較他人容易接受這項投資，可能是因他愛鑽研電腦軟硬件，兼且有投資經驗。

「玩Bitcoin有三類人，好似我嗰啲，叫做礦工；另一類係投資者，用真錢買Bitcoin嚟炒；最後一類係用家，用真錢換Bitcoin嚟買嘢，做交易。」他稱，做礦工挖Bitcoin的成本只是時間、電腦設備的購置及電費，「對於一個學生，時間未算好值錢。只要屋企部電腦有張強勁嘅顯示卡，就可以挖，所以無咩成本。最瘋狂嗰時，都係買咗八部電腦一齊挖，再加每月幾千蚊電費啫！」

Adam在日本宣布實行負利率後，買日圓沽美元，賺近一萬元。

虛擬貨幣和外匯有各自的吸引力。

賺廿幾萬遠勝金股匯

作為先頭部隊，Harvey成功飲得頭啖湯，「Bitcoin由幾仙開始，被人炒到八千幾蚊人民幣，之後個價就一直跌，一路跌我就一路沽，所以我都賺到錢。」他未計過單在挖Bitcoin上所賺利潤，但投資虛擬貨幣的總回報，扣除硬件等成本，純利達二十多萬元。他笑言：「我喺虛擬貨幣賺嘅錢比起在股、金或匯賺嘅多。」

出乎意料的是，他之後在其他虛擬貨幣所賺的竟比Bitcoin還要多，「當愈嚟愈多人認識Bitcoin，挖Bitcoin嘅利潤就會被攤薄。當我發現挖礦賺到嘅錢連電費都交唔起，就轉炒其他虛擬貨幣！」他明白過了「頭一浸」，就難再賺錢。

Harvey稱，無論投資股票或虛擬貨幣，都是一分耕耘，一分收穫。

理大Adam：美元淡友 乜都「匯」睇

「行街、搭（車立）時，其他人可能會玩Candy Crush，我就會睇匯價！」理工大學投資科學系三年級生Adam年半前學用程式交易，發現外匯市場非常大，較難被人操控，亦較易用技術分析找趨勢，故開始炒外匯，「比起炒股票同期貨，外匯近24小時都有波幅，歐元、日圓等貨幣嘅交易量又大，所以唔使太驚無人接你啲貨，又或好似細價股咁，價位單邊走。」

吼央行言論捉走勢

他透過外國的外匯商買賣，包括歐元兌美元、日圓兌美元及澳元兌美元。他稱，「我係美元大淡友！通常都買其他貨幣升，買美元跌。」他續指，「歐元過去有好多負面消息炒作，但係呢一年嚟都喺低位橫行，所以我睇歐元已見底！」由一五年初至今，歐元兌美元都徘徊在1.05至1.15區間。

他炒外匯時，主要留意央行言論的字眼，「我會問點解去到某個價位，央行會講呢番說話；到議息嗰陣，聲明裏所用嘅字眼又有咩唔同。我會好留意央行對息口嘅取態，從而估算外幣走勢。」他一般在央行議息前數天入市，然後持倉一天至最多一周，「匯價升跌就好似鐘擺咁，經過大方向嘅轉變後，就會喺一個波幅範圍上落，我就趁機低買高賣。」

投資者不斷短炒，手續費豈不是很襟計？Adam稱，「長揸外匯幾危險，央行隨時會改變幣策，所以好難估。我每次買賣外匯嘅手續費係匯價嘅3點子，唔算貴。」

慎用槓桿 衡量風險

Adam資金有限，故以槓桿去增加回報，但同時做好風險管理。「我會放錢喺外匯商，亦有設立止蝕位，所以就算蝕住，都習慣狠心離場。反而，賺就無話賺幾多要走。」

Adam分享他近期最成功的一次投資。當日本宣布實行負利率措施後，日圓應聲下挫，但翌日回升，於是他分段買日圓沽美元，兩天後沽出，賺近一萬元。日本央行今年一月廿九日宣布實行負利率，日圓兌美元即日跌1.92%，其後連續四天掉頭累升3.73%。