孖妹S檔案：真假‧牛熊市 有路捉

「睇浪」計數估落腳點

林：資深財經專家　林一鳴（Eddie）

彩兒：上年四月「港股大時代」期間，人人炒股炒到興高采烈，憧憬恒指上30,000點，你就斷言港股踏入咗熊市，結果之後港股真係大跌。你近期嚟個華麗轉身，由淡友變好友，話港股已開始進入牛市，仲叫大家儲定子彈等入貨，搞到原本對炒股心如止水嘅我，又再蠢蠢欲動。

Kitty：不過穆迪最近降低咗香港評級展望至負面，大摩又出報告，預測恒指今年最差見14,080點，城中富豪更話香港經濟今年會係20年來最差。究竟係牛市定熊市呀？我好亂呀！

林：啲人睇經濟、企業盈利去估個市升定跌，但個市升跌好多時係受群眾心理影響，呢樣嘢會影響資金流向。好多時股市會行先經濟半年至一年，甚至直頭唔同步。

彩兒：係喎，你鑽研波浪理論咁多年，港股開始進入牛市呢個預測，唔通係數浪數出嚟嘅？

林：去年四月廿七日恒指上到28,588點，嗰個係近呢幾年股市頂位，中間經過A、B、C三個唔同跌浪，到今年二月十二日最低跌過落18,278點，期間累跌約10,000點。18,278點應該係C浪嘅底，完咗C浪會返牛市周期。

牛市分牛一、牛二、牛三呢三個階段，牛一嘅時候，經濟通常都係好差，比如○三年四月，嗰時爆發緊沙士，滙控（00005）跌到落33蚊，所有經濟數據都唔好，但其實已經係牛市開端。呢個階段多數投資者都係睇淡後市，正如今日冇咩人會預期恒指可以升過25,000點，估升過22,000點嘅人都唔係好見有；由於大部分人睇淡，持股量偏少，所以個市較難再跌落去，大家都冇貨，仲有邊個沽？反而呢個時候有少少人買番，個市就容易升番上去。

資深財經專家林一鳴稱，股市很多時候會行先經濟半年或一年。（黃知樂攝）	恒指回落不少	瑞士寶盛周雯玲表示，港股PE被不少內銀股拖低。

見兩萬不妨開始買

Kitty：咁港股之後嘅走勢會係點？

林：牛市一期會有一浪升、二浪跌嘅模式。之前熊市ABC浪，港股由28,588點（一五年四月廿七日）跌落22,836點（一五年七月八日），再彈番一次，啱啱約係跌幅嘅一半，上番25,634點（一五年七月廿一日），跟住再跌落18,278點，呢次嘅跌幅係7,356點。

基本上，今次牛一嘅升幅會參考番對上一次C浪嘅跌幅，終點嘅可能性有三個，包括係21,088點（7,356×0.382+18,278）、21,956點（7,356×0.5+18,278）同埋22,824點（7,356×0.618+18,278）。恒指下一個阻力位會喺21,088點，睇吓呢個位過唔過，唔過就會落番晒去，但就應該唔會跌穿18,278點，過到嘅話，再睇第二級21,956點，再升穿就睇22,824點。（恒指上周四收報20,345點）

彩兒：睇睇吓有啲暈浪添，我都係覺得有番啲基本因素支持安心啲。

林：中國放寬咗貨幣政策，市場資金多咗，股市自然會好，A股由高位跌咗近半，再大跌嘅機會唔大，加上我估計美國今年只會加一次息，甚至唔加，比市場預期嘅次數少。

Kitty：依家個市唔上唔落咁，幾時入市好？

林：恒指去到近20,000點嗰啲位就可以開始買貨，驚嘅話買住一半先，去到啲阻力位可以減磅，見到佢升穿個阻力位又加番。完咗呢個升浪會有個回調，落番去二浪，之後大部分人嘅情緒會轉好。到確定大市進入牛市第二期，就可以瞓身買入去，依家就邊買邊睇。

內房基建內銀看俏

彩兒：諗起係時候重返股場，咁買咩好呀？

林：可以盡量睇番啲受惠貨幣政策寬鬆嘅板塊，內房、基建行業今年應該會做好。建行（00939）、工行（01398）同中行（03988）呢幾隻內銀都可以考慮，佢哋依家得4、5倍PE（市盈率），息率有7至8厘，有防守性，同埋佢哋都係國企，倒閉機會基本上係零。另外，當油價回落番去近30蚊，都可以買番啲中石油（00857）。今年股、金、匯、油當中，我比較睇好中港股市。

阻力漸現 隨機應變

周：瑞士寶盛私人銀行中國及香港高級證券分析師　周雯玲

彩兒：港股由二月中18,278點，升番上20,000點樓上，究竟有咩利好因素帶動呀？

周：香港個市暫時跟外圍環境走，近期油價、人民幣都穩定咗，歐央行又公布咗議息結果，話唔會再加大負利率，但會繼續做量化寬鬆，同埋聯儲局議息後維持利率不變，過去一段時間有好多穩定信心嘅消息出咗嚟，令市場風險胃納提高咗，所以你見個市喺二月中開始上升，問題係嚟到呢個位個市點走。

成交奀數據曳 不似牛

Kitty：你知啦，我哋呢啲散戶，永遠都係後知後覺，二月中冇捕捉到個低位入市，咁既然外圍環境穩定，我係咪依家應該追入？

周：市場信心係恢復咗，但如果突然有咩事發生，信心冇咗嘅話，大家又會好快謹慎番。反而，我覺得個市升咗咁多，大家要睇位，恒指由二月中到依家都升咗十幾個百分點，大家要衡量下自己嘅風險承受能力。實力股唔怕揸，但依家係咪要跳入股市去買呢？我覺得要自己衡量，依家個市已經有阻力。

彩兒：聽你咁講，即係依家唔多似係牛市？

周：你見到啲風險資產同商品都有回升，新興市場貨幣亦升咗，高息債同零風險債券之間嘅息差都回調咗好多，你睇得出啲人係願意承擔較高風險去換取較高回報，但信心唔係好足。睇番港股個市嘅成交量唔係好多，啲經濟數據又咁弱，大牛市嘅表現完全唔會係咁，冇可能踏入咗牛市。依家市場參與度唔高，有起咩事上嚟，啲人好快會獲利套現。

恒指PE唔平 吼穩陣股

Kitty：之不過港股依家得嗰8、9倍PE，唔抵買咩？

周：港股嘅PE咁低，係因為被好多內銀股拖低咗，其實唔計內銀股，恒指PE都唔係話咁平。投資者買內銀係因為息高，但派息可以減（口架）嘛，呢個係一個風險，發生嘅話會影響股價。我一向建議客人買啲好穩陣嘅股份，睇重管理層質素、業績、現金流同埋派息係咪穩定，咩時候買呢啲公司都冇問題嘅。

彩兒：你話港股受外圍市況影響，嚟緊聯儲局如果真係加息，個市會唔會又再震過（口架）？

周：依家市場嘅共識係今年美國會加多兩次息，聯儲局之前一路將息口減落嚟，當經濟好轉，係要將利率周期正常化，令未來經濟有咩問題，都有空間再減。睇番聯儲局嘅決策，佢唔會閉門造車，上年八月人民幣有個好大嘅波幅，都影響咗美國加息步伐。聯儲局會考慮外圍環境，以及自己嘅經濟。大家將美國今年加多兩次息嘅預期反映咗喺資產價格上，假如結果同呢個共識有出入，就會令市場出現震盪。

若有料報畀彩兒同Kitty或有嘢問，可電郵money.biz@on.cc