Market Insight：石油股前景唔明朗

舊年A股一場股災，中國以政策牛市推動經濟的如意算盤打唔響，阿爺即刻把戰線轉移，走去力托樓市，一方面協助清理三四線城市發展商庫存堆積的問題，更為一旦樓市跟住股市崩圍，財富萎縮的骨牌效應會令保增長計劃提早宣告失敗，故限購、限買等調控措施陸續下架，熱錢紛紛湧向樓市搵食，結果樓市在經濟奇差的環境下，背馳地出現拗腰回升現象。

到上個月，就連三線城市平均樓價都已經止跌回升，錄得0.1%升幅，一線城市升到爆廠就更唔在講，過去一年深圳樓價漲幅達57.8%，同隔條河的香港北區樓市，真係天壤之別。

一線城市再出辣招

針對部分城市樓市過熱，兩年兩會提出區域性調控的構想，上周上海終於推出被譽為史上最辣的新政，分三招應市，包括二套房普通住房，首期比例不低於五成，非普通住房首期更不低於七成；非滬籍人士購房條件，社保年限由兩年提升至五年；嚴禁房地產企業與中介機構從事首付貸、過橋貸等場外配資金融業務。

無疑，市場一早預期一線城市短期會針對火熱樓市出辣招，報道話政策生效前24小時唔少人趕上車，上海一手樓成交超過1,700間，都咪話唔誇。點都好，今次三招確實幾辣，一線城市非核心如鄉郊地段，在大幅提高首期比例之後，業界估計短期熱度必定降溫，估計深圳與北京漸見泡沫形成的地區，都會排住隊出招。早排古勝建議趁高減磅，或換入因為基建需求回升，無直接受衝擊的水泥股，應該都無個錯字。

話時話，咁啱人行行長周小川鼓勵民資進入資本市場被解讀成呼籲居民存款流向股市，上周證金公司減融資息率，場外配資又再死灰復燃，看來有形之手正趕熱錢由樓市回流股市，依家只係要睇，猶如金魚一樣得幾秒記憶的A股大媽，可唔可盡快忘記傷痛，重新上路。

愛買磚頭無分國界

講開樓市，內地資金在全球四圍掃貨，本來唔係乜新聞，想了解一下，甚至唔使搭飛機，看官周末去中環幾間酒店的臨時展銷廳睇睇，已經唔難見倫敦、悉尼等內地客至愛的磚頭市場，賣樓好似搶奶粉同疫苗一樣。

啱啱周末去八吓，可能英鎊因為公投關係弱咗，當地樓盤唔單只叫價愈來愈進取，亦都有愈來愈遠市中心的趨勢。

早排有統計話，去年加拿大溫哥華樓市三分一成交由內地買家承接，咪話唔誇。在下有朋友本來舊年返回溫哥華置業定居，因內地買家追價愈來愈狼，往往一個盤十幾廿個bid，仲搶到業主放盤價高三、四成，更係唔經銀行可以短期科晒水，搞到普通買家根本上唔到車。

唔少人估內地經濟唔好，內地客購買力會減弱，實情人行愈聲嘶力竭話人仔無貶值基礎，內地客愈驚，趕住將人民幣仲有超強購買力之下走得就走，搶到全球大城市樓價都貴晒。

油價今年初顯著下跌，紐約期油一度失守30美元，之後在沙特阿拉伯、俄羅斯、卡塔爾及委內瑞拉同意凍產之後，油價由低位反彈，並連續五周做好，但前周美國庫存急增至940萬桶，遠高於市場預期，拖累油價回落。油價由低位累積升幅不少，相信新一輪跌勢隨時展開。

在油價下跌拖累下，「三桶油」在復活節假期前明顯有沽壓，當中以中石油（00857）跌幅最大，跌4.2%，中海油（00883）及中石化（00386）均跌逾2%。

需求疲弱拖低盈利

國際油價下跌，對油企的盈利構成直接打擊，中石油去年少賺67%至只有355億元人仔，是上市以來最差的一份業績，至於上周四公布業績的中海油，盈利同樣錄得66.4%的跌幅至只有202億元人仔，可見油價下跌對油企的盈利造成極大殺傷力。

由於影響油價的基本因素並未改善，全球對原油需求疲弱，難以支撐油價繼續回升，估計今年仍會在低位反覆徘徊，油企盈利難免會進一步受壓。多間大行在中石油公布業績後，相繼調低其目標價，相信中海油亦會與中石油同一命運，遭大行下調目標價，估計三桶油短期仍有沽壓，暫不宜沾手，有貨亦應考慮先行沽出。

古勝