絲絲講場：內地財俊潮興化妝

男人化妝，日、韓男星好普遍，修眉係基本，進階就畫埋眼線。多得貿發局嘅消費調查先知，原來依家內地男人都興護膚同化妝（冇錯，係化妝！），有5%受訪內地男係日日化，話有需要場合先化嘅都有29%！

多用BB Cream遮瑕膏

貿發局舊年年底喺內地多個城市，訪問咗3,200名20至45歲過去三個月買過護膚或化妝品人士。

內地男話希望皮膚睇落更細滑同整潔，所以化妝。貿發局大中華區研究團隊經濟師曾詩韻同啲內地男傾過，佢哋多數用BB Cream、遮瑕膏同防曬產品；啲化妝男通常係做地產、金融一類要見客嘅。

曾詩韻話，可能因為韓風吹得勁、廣告又賣到上晒腦，所以咁。

不過，其實得20至30歲嗰批內地男比較多化妝，曾詩韻話年紀大啲嘅就唔係好得。受訪內地男當中，講明話接受唔到男人化妝嘅有43%。女人又點睇？28%受訪內地女話可以接受，高過男人話可接受比例（21%）。

余絲韻