Market Insight：電力股前景有隱憂

產油國凍產而不減產，二月中油價已跌唔落開展超賣後反彈，輾轉由26美元返到42.5美元，低位狂升六成三。聯儲局出口術，令市場對加息預期進一步降溫，美元拒絕再升，美匯指數在98至100阻力，三頂不破，連同商品的反彈，成功製造一次相當立體的冚倉潮。道指從15,503點升到周二高位17,648點，升幅13.8%，又再逼近去年底17,796至17,977點的三頂阻力。

美股能否破位並延續強勢，是一眾投資者三月底、四月初部署的重要考量。對於港股投資者，似乎中國近日的大動作影響可能更加深遠，阿爺有迹象準備放水畀A股大媽再癲過，單睇過去八日，滬綜指七支陽燭，A股大有山雨欲來的氣勢。

舊年A股爆煲後，阿爺力托樓市，美其名是要解決三、四線城市庫存問題，講到底都係唔想見樓市冧，加劇股災後財富萎縮效應，拖跨本來就死死吓的內部消費。要知中國經濟從來環環相扣，未解決一個問題，新問題又再浮面，大媽唔炒股，結果熱錢順應國策群起走去炒樓，經過由打壓變成托市的一年。

再次炮製人造牛市

今日三、四線城市去庫存未竟全功，一線城市樓價卻率先升到爆廠，最誇張的深圳，一年升幅超過五成，樓價已直逼甚至超越九龍區部分屋苑，上海亦升一成八，北京升一成。一線城市樓價同經濟愈見背馳，故兩會期間，已放風話可能出區域辣招應對。

近日人行行長周小川在G20話推動資本市場發展，及後澄清市場錯誤解讀，佢並非鼓勵市民攞簿仔提款去炒股，但口裏說不，行動卻很老實，近日先有證金公司減融資費率（即孖展息率），配資公司在監管放寬下，亦有捲土重來之勢，陸續出現孖展任借情況。

信唔信都好，反正古勝深信中國試圖炮製新一浪人造牛市，準備炒冷飯，再一次使出股市救經濟的招數，順便為投機熱錢過剩的樓市減減壓。

政策牛2.0行唔行得通？當然要睇大媽落唔落疊。客觀環境，舊年國家隊入市收乾唔少權重股，有利炒上，救市後，阿爺包底心態成為大媽心中共識，A股從來是賭徒天堂，有大莊家批准賭白頭片（配資及券商放貸鬆手推波助攔），A股爆上去絕對唔出奇。如果揸唔定主意追邊個板塊，索性吼番A股ETF，未來兩個月好可能有意外收穫。

高位唔上唔落，長假期前夕港股今日可能更靜，心水車仔股繼續當炒，吉利汽車（00175）周二中午出完業績唔行，到昨日至嚟爆上，升10.5%報3.76元。炒鬼睇好周末推出新型號SUV好賣，推動一六年業績維持強勁增長，大行之中，美銀美林由中性升級到買入，以7倍PE計睇4.4元。

減費幅度恐超預期

內地電力股陸續出成績表，受惠於低煤價，華能國際（00902）去年賺136.52億元人仔，升26.9%，華潤電力（00836）賺100.25億元，升8.8%（受一次過開支影響）。去年兩隻電力股售電量分別錄得8.8增長（主要源自新收購機組）及6.5%的倒退，但喺單位燃料成本分別跌14%及21%支持下，業績雙雙維持難能可貴的增幅。

兩股在業績後都有見光死現象，顯然投資者唔信一五年賺大錢的好日子，可以延續落去。事實上，內地電企發電高增長期，經已在出口製造業持續低迷下告一段落，進入單位數的緩慢增長期。

電企售電量既要靠收購貢獻增長，更怕是計劃經濟下，阿爺要電企開始回饋社會，未來或現電價減幅比煤價更大的情況，現在的低估值高股息率，正預示這方面的風險。

古勝