孖妹S檔案：負利率成風 點算好？
「負利率……負利率……」呢排日日都睇到或者聽到呢個Term，搞到孖妹班姊妹心肝仔卜卜跳，怕負利率會影響佢哋銀行存款，甚至係投資，壓力太大之下仲趁Mid Season Sale瘋狂購物，我哋實在睇唔過眼，死死氣帶佢哋去搵專家問清楚負利率究竟係乜東東。
港美同步 負息難現
王：星展（香港）財資市場部董事總經理 王良享（Tommy）
Kitty：死喇死喇，依家個個國家開口埋口都講負利率，香港遲吓會唔會跟風推（口架）？
王：香港從未出現過負利率，即使喺活期存息亦冇見過，唔使太擔心﹗近廿幾、三十年，香港利息同美國同步，美國冇產生負利率，香港係唔會有，美國商業銀行存款喺央行收緊0.5厘，即使加息前，喺「零息時期」，都有0.25厘息收。不過，香港冇存款準備金嘅要求，商業銀行普遍唔會放太多存款喺金管局，當局冇畀息呢類存款，都冇試過負利率；金管局嘅貼現率係美國聯邦基金目標利率（Fed Fund Target Rate）加0.5厘，依家係0.75厘。
王：美國貨幣政策較其他地區行之有效，銀行借錢出去嘅意願係高嘅，所以推行負利率嘅機會較低。推行負利率嘅功能主要有兩項：若然傳統減息、買債已經冇乜效，就行負利率，推動商業銀行借錢出去；另一個較大嘅效用係打壓本土匯價，美國出口僅佔GDP（本地生產總值）十多個百分比，消費佔比達八成以上，基本上都係內需，所以冇需要將美元匯價壓低，佢嘅出口多數係知識性出口，所以亦毋須以匯價作競爭，再者，行負利率嘅成效存疑。
目前僅涉商業銀行
彩兒：日本實施負利率，會唔會搞到存戶擠提，個個寧願提錢返歸放落床下底？
王：依家負利率只係涉及商業銀行啫，日本嘅負利率措施分三層。商業銀行早前已有二百幾萬億日圓存款存咗喺央行，呢批存款日央行仲係畀緊0.1厘息，法例要求比率嘅存款準備金係零息。但係二月十六日開始，商業銀行新增超額準備金，就要被收取-0.1厘。
王：如果銀行要被徵收負利率，都總唔可以拎晒出嚟放喺夾萬，其中一個出路係借錢畀同業，變相拖低同業隔夜拆息利率，令佢出現輕微負息現象，所以變相銀行會想長時期啲借出資金，博收高啲息，於是走去買國債，又壓低國債息口，搞到日本十年期國債債息亦出現負息。
進取型不妨諗日股
Kitty：歐洲擴大負利率，歐洲人咪牙痛咁聲？
王：歐央行推行負利率嘅策略同日本唔同，只要商業銀行存款入央行就收-0.4厘，銀行同業隔夜拆息都係負息，銀行要保障自己，就惟有借錢畀企業賺吓息差，或者投資債券，所以令國債孳息率，如德國七年期以下國債債息都係負息。但歐洲實行負利率，就未辣到歐洲啲存戶。
王：啲央行其實可以更進一步，連貸款畀商業銀行都推行負利率，換言之，貸款人仲有錢落袋，雖然係前所未見，不過唔一定無可能發生，因為歐央行TLTRO（定向長期再融資操作）措施，係四年期貸款，每三個月做一次，簡單嚟講，部分銀行以抵押品向央行借錢，歐央行最低收取-0.4厘利息，即係歐央行倒貼商業銀行借錢出去。
彩兒：哎啊，咁人哋國家推負利率，會唔會搞到我哋揸住啲投資都蝕（口架）？
Kitty：我都係諗得正面啲，或者有啲投資可以間接受惠呢……
王：若係一個被動型嘅投資者，影響唔大，主因香港存戶做外幣存款嘅話，銀行點都象徵式至少畀番0.01厘息口你，即使蝕錢都想留住你，謀求第日有其他交叉銷售嘅機會，所以頂多係冇息收啫！
王：如果係進取型投資者，反而可以考慮投資日股。雖然日本只係推行咗負利率一個多月，但日本最大八間銀行嘅按揭申請升約兩成，Refinancing（再按揭）申請仲升咗1.5倍；另日本三大百貨公司（三越、大丸同高島屋）二月份嘅月供Coupon（優惠券）上客量多咗一至兩倍不等，可見對消費同樓市造成刺激。
王：顧及東京二○年舉辦奧運，可留意主力喺東京發展住宅物業嘅大型房產公司，如三井不動產（日股：8801）、三菱地所（8802）及住友不動產（8830）等，相關股份經上年八月調整後已相當抵買。不過，商業物業需求視乎經濟環境，依家又唔見得日本有開放市場吸外資嘅計劃，所以揀主力發展住宅項目嘅日股較值博。
股市短升 作用難料
何：交銀高級經濟及策略師 何文俊（Patrick）
彩兒：推行負利率嘅國家，股市似乎會應聲急彈，升市會唔會好「短命」？
何：推行負利率，簡單嚟講，理論上係想銀行存戶將存款由銀行提走，資金主要有三個去向，第一係床下底，第二係消費，最大作用就係買資產同炒股，政策制訂者原意係想將資金趕去其他資產市場，資產市場首個反應會因為單純受惠憧憬而彈升，而唔係因為資金由銀行流去股市先受帶動，所以只有短期利好作用，就好似日本咁，升勢一閃即逝。
何：中期嚟講，資金流入股市嘅說法成疑，由於唔少國家並非全面推行負利率，如日本央行只向新存入嘅儲備金實施負利率，加上原本嘅經濟問題其後現形，令市場對措施嘅熱情減退，再者，負利率勢打擊銀行盈利，金融股或受累，最後拖低股市，所以中期股市會打回原形，甚至下跌。不過，因為負利率往往唔係長期措施，所以好難估算佢對股市長期嘅影響。
Kitty：唔係喎，歐股喺推行負利率後走勢唔錯。
何：歐股做好同負利率無關，只係由市場對佢「放水」嘅憧憬帶起，其實歐央行一四年減息同推負利率，但見成效唔掂，同年十月急急腳推量寬買債，買國債唔掂，之後仲買埋企業債添，所以已經證明推行負利率唔Work。其實推負利率只係代表一種市場取態——義無反顧放水嘅訊息。
聯儲再加息先入市
彩兒：我哋都學過吓德文、法文同日文喎，趁機攻歐、日兩地股市，可以殺出一條新血路？
何：歐、日央行大規模量寬嘅目標明確，但措施對股市嘅邊際效果不斷遞減，以往市場會覺得只要加大力度放水就會有改善，不過依家即使有彈藥都冇乜效果，央行會擔心市場已失去信心，現時相關市場嘅升勢係來自市場亢奮咋，所以持貨人士應該趁股市抽升出貨先。
何：我建議投資者可以等聯儲局落實再度加息之後先入市，因為佢一向係市道好先加息、市差就「回塘」，所以不妨跟住佢諗法做投資，等加息後市場出現恐慌先部署，博佢會放軟手腳令股市彈升。
何：歐、日股市有央行托市，每每跌幅唔多，留喺較受美市影響嘅港股懷抱較可取，屆時選擇貼市嘅指數型產品即可。
若有料報畀彩兒同Kitty或有嘢問，可電郵money.biz@on.cc
Kitty 彩兒