理財創富：80後日瞓4粒鐘上車築愛巢

現職美國萬通財務策劃高級經理的張天天，自小與家人分隔中港兩地，三年前來港發展。他回想道：「我喺福建長大，喺天津讀大學，畢業後喺天津做過銀行櫃位服務員同埋大型公司市場推廣，喺朋友眼中好吃香，但自覺作為唔大，覺得香港嘅發展平台比內地大，又想同家人團聚，所以當時就同拍拖5年嘅女友分手，嚟香港大展拳腳。」

朋友圈中首個置業

甫來港，他便任職理財顧問至今，雖出身金融系，惟初時不諳廣東話，又感人生路不熟，令他難以適應，缺乏歸屬感。「好彩當時同事幫我惡補廣東話，亦好彩得到上司同朋友幫手，事業先上軌道，現時我專做內地客，月入約7萬，對比其他大學同學搵多好多；以香港朋友圈嚟講，我係第一個置業。」可見張天天對來港決定無怨無悔。

張天天去年認識曾任車模的未婚妻，更成為他賺錢原動力。他透露，女友現居深圳，家境富裕，而自己則出身小康之家，雖然未來岳父、岳母並無要求他努力賺錢，更指只要兩人生活愉快，已別無他求，為表愛護之心，更將一所於深圳福田區700萬元人民幣的單位轉歸女兒名下，另計劃提供首期，讓他們再於福田置業。惟他稱，為保持未婚妻婚後生活質素，來港後毋須為錢財煩惱，所以終日過「爆肝」的生活，也萌生在港置業的念頭。

五百多萬買愉城三房

他去年八月起已密密睇樓，目標為荃灣愉景新城實用面積約600方呎單位，因鄰近父母居所，且屋苑內有中港巴士，方便到深圳探未婚妻，惟當時正值樓市高峰，同類低層單位叫價動輒近640萬元，使他頗頭痛。及後樓市回調，他便於今年一月再睇樓，「睇咗兩至三個單位，決定買愉景新城600呎、三房兩廳兩廁嘅中層山景單位，經議價後，終以500多萬元上車。」

理財顧問收入並不穩定，銀行審批樓按時，將他的收入打七折至4.9萬元，終敍做六成按揭，需付約225萬元首期，每月供款1.5萬元，另擲60萬元「豪裝」。正所謂：「有媽的孩子像個寶。」父母支持他成家立室，故斥資逾百萬元付一半首期，希望紓緩愛兒的供款壓力，另主動資助一半裝修費。

去年靠兩A股勁賺

數年內儲過百萬元非易事，他指，個人投資策略進取及高風險，主要靠投資股票獲利，「淨識慳冇用，進攻係最好嘅防守，喺舊年大時代，靠兩隻A股賺最多，一隻係石峴紙業（600462.SH），另一隻係宋都股份（600077.SH），亦成功沽貨獲利。」現時將四成收入交予父母儲起，而月供股票基金、股票投資、個人使費則各佔兩成。

雖然現時新居尚未入伙，他已計劃再購一單位予家人居住或作出租。他坦言：「買物業可以抗通脹，我堅信買物業唔會輸！樓市約十年一個周期，抗跌力較股市強，又唔使好似股票同基金咁成日睇住，我預計樓市會再跌一至兩成，一旦跌一成半就會再出手！樓市有波動性係正常，我唔會心理唔平衡。」