Market Insight：科網股係時候建倉

一切壞消息現已好像不復存在，港元升穿7.76，好快又逼近強方保證位，唔通真係有資金流入？外電話對沖基金沽人民幣損手5.62億美元，大部分經已投降。阿爺擊退大鱷，股市一身鬆晒，油價亦反覆推升，加埋周中聯儲局被睇死唔敢加息，負面因素如中港主權評級展望被調低以及內地經濟數據欠佳等，暫可擱置一旁。

不過，可能呢大半年都係跌多升少，故在下對股市全面上升仍心存戒懼，唔知幾時再轉勢，高盛調低今年布蘭特油價預測至38.5美元，油國開完會後隨時趁好消息出貨。

房地產打救百業

講番周末公布之內地經濟數據，當中有好有壞，最靚仔的是固投，比去年全年增0.2個百分點，雖然只係微增，但扭轉跌勢，屬萬綠叢中一點紅。既然出口唔掂，就自然要用固投來補數，而且中央肯出錢就搞掂，所以基建股前排咁精神事出有因。

另一樣投資大升的自然是房地產，突然又興起搶地，雖然話中央不樂意見到炒風，但房地產一起就百業興旺，地方政府賣地多咗收入，亦順帶解決好多問題。至於樓市泡沫有乜後果？唔好問住，先解決今餐再諗下一餐。內房復起一呼百應，貨尾單位不跌反升，所謂「去庫存」政策會帶來反效果。最開心莫過於建材行業，安徽海螺（00914）及華潤水泥（01313）均升逾4%。

近期寫內房股已寫得多，但昨日有兩單嘢不得不提。中國海外（00688）買下中信股份（00267）旗下物業組合，萬科企業（02202）則向深圳地鐵上蓋物業同時引入對方為股東，其實亦是睇好房地產後市表現。昨日中海升、中信跌，是否代表中海執咗平貨？通告話物業組合絕大部分在一、二線城市，但瑞信報告話集中在三線城市，究竟邊樣真暫未能定論。不過，一間發新股，一間賣物業，轉吓手一家便宜兩家着，但股價最先跑出係做物業管理之中海物業（02669）。

中信翻身有難度

中信一四年發大量新股購買大股東手上資產，當中買房地產業務最唔抵買，因為根據國家政策，國有資產不能低於帳面值注入，但其他內房股普遍資產折讓幾成。不過，連同其他金融資產打包整體上市，房地產變成只佔一小部分，並搵埋唔少大孖沙拍心口認購新股，自此之後中信股份大部分時間橫行，大孖沙亦一直坐艇。

受惠於地價及樓價上升，中信今次賣物業可帳面賺約100億元，差不多可抵銷澳洲鐵礦石撥備，但同時持有中海一成股權，實際在物業部分的參與並無減少。而中信最重要兩項資產繼續是中信銀行（00998）和中信證券（06030），兩隻股依然股價低迷兼前景麻麻，因此中信股價亦暫難翻身。

近期另一受注目的是「人腦大戰」，南韓棋王李世乭終於扳回一局，但AlphaGo大出風頭，究竟電腦識唔識「放水」仍是個謎團，惟科技取代人手或人腦再多一個鐵證，未知是否因此之故，科網股昨集體上升為AlphaGo吶喊助威。然而，原本一向作為升市火車頭的科網股，今次竟然落後於大市。無他，磚頭、建材及煤炭股等舊經濟股近期成為主角，所以科網股暫時要讓一讓路，但世界只會向前進，趁價格出現差距，亦係時候考慮建倉。

騰訊仍最具潛力

環顧各隻科網股表現，股王騰訊（00700）已算最好，畢竟公司尚有很大潛力尚未釋放，像facebook般有龐大用戶基礎，一打開賺錢竅門後可望盈利爆發性大增長。二哥金山軟件（03888）股價仍低迷，但上兩個季度公布業績後股價明顯上升，一星期後又到派成績表日子，睇趨勢有頗大值博率，只慮紐約上市的子公司獵豹股價似乎變咗病貓。

其餘二線分子，科通芯城（00400）有納入滬港通名單沖喜，股價算是不俗；中軟國際（00354）最奇，近月股價在2.5至2.8元之間窄幅上落；金蝶國際（00268）走勢亦相似，看來要憑業績分勝負。

不過，穩陣投資者應該最愛騰訊，遊戲、廣告、社交網絡及線上支付均具增長空間，一五年38倍PE，一半是現有業務估值，一半是未來概念。

古勝