絲絲講場：津行董事長最叻債轉股

呢排內地有聲氣，出招加速清理內地銀行嘅不良資產，話快可實行「債轉股」。簡單講，即是畀啲債仔向內地銀行以股抵債；咁搞，恐怕內銀風險會增加，「不良資產」同「債轉股」呢幾粒字，對內銀嚟講，都可算敏感字眼。不過，天津銀行（01578）董事長袁福華尋日喺新股上市簡介會畀人問到呢一點，佢不知幾歡迎，仲笑晒口！

何解？一個字：「威」囉。袁福華話自己九九年時，做過內地信達資產管理公司嘅第一把手，真係要用到呢招時，佢最拿手；佢仲笑晒話，記者呢一條問題勾起佢17年前嘅回憶添。（怕你太後生唔知，信達當年至出名就係處理「不良資產」，絲絲點知？聽啲前輩講嘅。）

話說天津銀行同浙商銀行（02016）上市撞晒期，都係預計今個月三十日掛牌；不過津行袁福華話係一種緣分喎。

余絲韻