絲絲講場：股神御用中國裁縫攻美

堅，全部係內地公司大楊創世出品。大楊創世董事長李桂蓮出身農民，七九年用借番嚟嘅3萬蚊人仔起家，依家已經係五千個僱員嘅高級訂製西裝王國，仲係上海上市公司。咪睇李總唔曉英文，用身體語言同股神一樣溝通得到。

拉埋超豪老友捧場

股神9年前開始着佢哋啲西裝時講過，話自己活咗78年，終於有人讚佢「好樣」，於是掉晒佢以前啲西裝。股神唔只自己Like，仲拉埋Friend落水，結果巴郡副主席芒格同全球首富蓋茨齊齊着中國貨。不過股神似乎齋Like啲西裝，冇入股間公司。

呢間股神御用裁縫最近直頭踩入美洲。佢哋舊年攻入紐約曼哈頓，喺Brooks Brothers'旗艦店同區，開咗間4,000呎嘅首間美國門市；近排又有聲氣話打算用大概2.34億港元入股加拿大網購西裝公司Indochino添。

聽講，連美國前總統喬治布殊同內地前領導都係着佢，邊位前領導？好頂級嗰隻，你自己估吓。

余絲韻