絲絲講場：90後投資唔夠父母叻？

咪嬲嬲豬住，係講緊美國。美國投資平台Openfolio統計咗今個二月啲散戶投資回報，發現有66%散戶蝕錢。蝕得最慘嗰批係25歲以下（即是90後），平均蝕0.79%；只有一個年齡組別有賺，係50至64歲嗰批，即是啲90後嘅阿爸阿媽輩！

老一輩勝在分散風險

點解90後今趟蝕咁多？佢哋係輸在投資太集中唔夠分散，平均波幅又有成41%。相反，佢哋阿爸阿媽輩就勝在夠平衡：44%投資ETF，45%買股票。

咁香港啲90後又點先？睇過。

科大經濟及財務學三年級生徐兆銘（Sam）話，佢同爹哋媽咪投資一樣咁渣！因為大家都係普通散戶，會有羊群心理，有時會做錯投資決定。不過，Sam話有樣嘢自己同爹哋唔同：爹哋就算坐艇都唔會止蝕；Sam就會定止蝕，雖然蝕嘅次數多，但係好彩銀碼細。

中大國際金融與中國貿易二年級生Yannie就話，雖然自己冇投資經驗，但自覺點都贏唔到爹哋，因為爹哋炒開股票兼有買內地樓，投資經驗夠！

Yannie爹哋本身無咩金融背景，反而Yannie媽咪喺金融界工作。但估唔到Yannie話，如果同媽咪鬥投資叻，Yannie反而有信心贏，因為媽咪唔緊貼住個市咁話。

余絲韻