絲絲講場：銀行直認 「揼石仔年代」

過去幾十年銀行有幾風光，唔使多講，不過近幾年歐洲、美國嗰邊啲銀行完全唔掂，不時畀啲客或者政府告，香港銀行都仲大把世界，就係靠「祖國」兩個字食胡，食住呢條水等內地大客嚟借錢已經夠數。

星展真人真事微電影

不過今時唔同往日，港銀正式告別大茶飯時代，星展香港董事總經理張建生話，內地借錢平，企業無咩特別唔會再落香港借錢，所以銀行「返到揼石仔年代」，要勤力密密做，不斷搵新客，仲要無微不至先夠生意。

好似星展集團最新出咗套微電影講點湊客，改編自真人真事。故事講有個年輕女子條村有塊地，佢好想創業搞太陽能發電，可惜好多銀行都覺創業貸款危險，仲要搞太陽能咁High Tech，一聽到就怕，即刻Say No。

幫助客仔艱辛創業

唔只咁，同時仲有發展商睇中年輕女子塊地，想收購嚟起商場。村民梗係想賣地分錢啦。呢個時候，星展熱心Banker幾經辛苦說服上頭批貸款，仲幫年輕女子氹掂班村民，等佢可以創業……結局當然係大團圓，星展又做得成生意，個客間公司仲成為跨國太陽能公司。

有間銀行咁對你，都幾肯定呢世都會繼續幫襯。不過絲絲不時都聽到啲初創公司畀銀行白鴿眼，莫講話借錢，做高科技金融嗰班，連開個企業戶口都畀咁啲銀行拒絕，銀行話唔明佢哋搞咩，太高風險所以唔開喎。呢啲一樣都係真人真事！

余絲韻