投資UWIN：型男索女理財大檢閱
大學校園是同學仔出入最多的地方，真命天子、夢中女神隨時在校園出現。所以話，平時返學就唔好擺副頹樣，Hea住着衫出嚟見人！記者走訪校園，訪問幾位型男索女，發現佢哋打扮各有風格。想做至潮男女，要識打扮就不在話下，更重要係識使錢，買啱衫褲得嚟仲有錢剩，究竟佢哋又做唔做得到？呢班年輕人的理財觀念又係咪夠醒？
兼職2/3收入行街買衫
以黑色短褸配牛仔褲，再襯短靴的Rachel，配搭簡單得嚟不失型格，原來她最大嗜好就是購物。「我差唔多月月都買衫，依家好多舖頭轉季on sale，我又忍唔住買，online shopping見到啱心水又會狂買。」她表示，每月花費於置裝上約2,000元。
碌卡忘找數被罰手續費
事實上，行街買衫已佔了Rachel每月支出的三分二，幸好她亦有兼職幫補一下。「我喺學校做兼職翻譯，亦有幫人補習，平均一個月賺4,000元，但每月支出都有3,000元或以上，所以唔係好儲到錢。」
Rachel手頭上有三張信用卡，由於她喜歡網上購物，故時常碌卡買衫。然而，卻常忘記信用卡還款，「我啱啱先唔記得找數，被罰手續費幾百元，其實已經唔止一次遲還，之前都有幾次畀人罰款。」
曾碌卡萬元買護膚品
理大的Yuki主修服裝市場學，對打扮有要求。全身純白的配搭，再加上精緻的外貌，清新脫俗！因修讀科目及興趣關係，Yuki常閱讀時裝雜誌，從而培養時尚觸覺，對衣服的質地亦十分重視。
儲蓄保險月供逾千元
「我覺得買衫要睇質地，會揀啲啱自己style的衫，偶爾都會上網買，價錢大約為200至300元。」除了服飾打扮外，她認為皮膚亦非常重要，故會大額花費在護膚品上。她指，現時有兩張信用卡，主要用作買衫及護膚品，「我試過碌10,000元買護膚品，跟住分幾期大額還款。」
Yuki沒有做兼職，收入來自父母每月約4,000元的零用，每月花約3,000多元，故儲蓄不多。幸好，她有買儲蓄保險，每月供逾千元。
購物節制 月使二千
港大百周年校園是潮人出沒的地方，Jack一身韓風打扮，純白冷衫令人精神抖擻，再配上loafer鞋更是摩登指標。他認為，恤衫配冷衫是斯文代表，而loafer鞋則是舒適方便。他打扮時尚，全身花費約1,500元。
衣着重款式 不追名牌
Jack表示，自己不是特別喜歡買衫，揀選準則以款式為主，亦不追求牌子，大部分衣服售價為200至300元，最貴都400元內。他在購物方面有節制，而且沒有信用卡，沒有先使未來錢的習慣，故每月都有些少儲蓄。
「我無做兼職，父母每月畀3,000元零用錢，而且因為我住宿舍包食、住，又無交通費，所以每月使大約2,000元，有錢剩會儲起。」
專家籲先苦後甜延享樂
眼見不少大學生花大量金錢吃喝玩樂及置裝，甚至sem break去旅行，中文大學商學院助理院長李兆波（右圖）指，大學生應延遲享樂，把閒錢儲起，為將來的財政自由做好準備。
他建議，同學們也應先苦後甜，找份好工才管玩樂。他續稱，「學生如果有做兼職，賺到啲錢，當4,000元，就應該至少將20%儲起。積少成多，咁先可以把握投資機會，例如買iBond。」
消費有必須與否之分
學生也應謹記不要先使未來錢，李兆波稱，「信用卡用嚟傍身好喇，唔好話信貸額有10,000元就用晒，信用卡係方便你唔使帶咁多錢出街，而唔係畀自己使凸。如果可以無信用卡就最好添！」。學生要分清必須及非必須的消費，並在消費時衡量自己本身的生活水平，因遲早也要獨立生活，自力更生。