孖妹Ｓ檔案：價值投資法 全方位反思
孖妹一直自覺係股神巴菲特嘅信徒，信奉「buy and hold」，買落唔少滙控（00005）呢啲好多人口中嘅價值股，hold咗咁多年嘅結果，咪就係冇好結果囉！所以我哋決定檢討吓自己嘅策略，重新領悟一套經得起風浪同時間考驗嘅股票投資法。
潘：富邦銀行財富管理部投資策略及研究部主管 潘國光
大氣候為投資根基
彩兒：計番條數，截至上月底，如果揸滙控十年，並將股息再投資，總回報係要蝕近三成，渣打（02888）喺呢段時期嘅回報就要蝕逾五成，睇嚟諗住買啲股票穩穩陣陣長揸賺錢，都唔係咁易喎。
潘：正常情況下揸價值型股票係冇錯嘅，但依家咁嘅環境可能會輸一半，你要捱番一倍番嚟會好辛苦。價值型投資雖有道理，但一隻股票可能要揸70年先賺幾倍，最弊如果我依家已經三、四十歲，唔知係咪等到。有啲人買股票蝕咗就坐幾十年，唔等錢使係可以嘅，但如果中長線都想做緊一個有意思嘅投資，就要有個計劃。
Kitty：咁你又有咩投資方法，可以令我唔使吓吓坐喺度，等隻股返家鄉呀？
基本因素分宏觀微觀
潘：投資股票可以同時睇基本因素同技術因素，當兩樣嘢都指向同一個方向，把握都大啲。如果兩者係持相反方向，咁就等吓先啦，反正機會日日都有。基本因素都有分宏觀同微觀嘅基本因素，前者即係經濟嘅大氣候，後者即係仔細咁睇番公司嘅盈利能力、估值等。我覺得可以由宏觀經濟分析做起步點，咁樣自然知道有咩暗湧、邊個地方有機會，可以幫你縮窄範圍，再用微觀分析慢慢諗揀咩股份。
彩兒：你分析依家嘅宏觀基本因素，又從中得到咩投資啟示？
潘：依家係宏觀主導微觀嘅時代，經濟上落會好大。今年宏觀經濟特別多暗湧，包括有油價、中國匯率同經濟因素、美國息口、歐洲金融企業同埋日本。依家有好多風險因素，你揀股可以揀到啲好平嘅股份，但喺咁嘅經濟環境可以變得更平。依家全球係去緊槓桿，因為○八年後央行進行量化寬鬆，製造咗個更大嘅泡沫，所以投資要偏向避險。新興市場、歐洲、日本股市已經調整咗，應該要等埋美股修正呢個泡沫，先至值得喺市場搵價值，趁低吸納。
Kitty：咁微觀嘅基本因素你又點睇法？
潘：如果比較同行業嘅股份，可以睇吓佢哋嘅資產負債表、盈利能力、估值、現金流等。仲要幻想你就係經營間公司嘅人，比較吓佢哋嘅商業策略。如果宏觀經濟唔太穩定，就可以揀隻防守性強啲嘅股份。
彩兒：做完一大輪基本分析，仲要做技術分析，好唔得閒啫。
技術分析睇買賣時機
潘：有人係淨睇圖都賺到錢，我嘅風格係兩者兼備。睇圖通常係愈短線愈適合，做中長線就要睇多啲基本因素。但做中長線投資淨睇基本因素又幫唔到我入場，比如我覺得經濟未來3年會愈來愈好，咁我要幾時買貨呢？技術分析就會畀到訊號我進場或離場。每一個交易都要有個計劃，有買入同賣出位、一個可以量化嘅目標。有人話止蝕唔止賺，但其實每一個趨勢都有機會轉向，所以無論做咩都好，都要有個目標，唔好畀個投資自己浮浮沉沉。
Kitty：原來你做過交易員，又做過經濟師同基金經理，唔怪得之你嘅投資法包含咗咁多唔同方面嘅分析啦。
潘：我係比較好彩，由交易員做起，呢個係一種每日都備受恐嚇嘅職業，你要喺十幾二十秒內做交易，利潤同虧損會放到好大，同埋你係用緊銀行嘅錢，交易嘅銀碼好大，吓吓都幾百球美金，嗰時發過一個夢，就係開咗個盤，輸到斬唔到倉，半夜醒咗標冷汗；做過交易員，就會對投資紀律特別敏感，所以唔會輸大錢。
梁：浩邦金融董事 梁彥穎
揀資產被低估股份
彩兒：嘩！你日日都喺股場出出入入嘅，睇見我都暈暈哋。
梁：我依家都係短炒多，好少長揸股份（口架）喇，見到資產被低估嘅股份先會揸長少少。
Kitty：你好似覺得依家啲公司好信唔過喎！
唔好同股票談戀愛
梁：一啲公司係因為管理層做得好所以賺好多錢，但唔係保證之後一路都做得好（口架）嘛。根本成個經濟情況已經變晒，依家資訊發達，競爭咁大，好似一間公司造無人機成功咗，之後就有幾百間公司跟住做，長遠點保證可以保持住龍頭位置，你估你係超人咩？況且公司唔係咁易將賺到嘅錢分畀股東，例如佢會將業務分拆，令最賺錢嘅部分唔再屬於原有嘅小股東，或者管理層領取好高嘅人工同福利。同埋依家咁多衍生工具，間公司一做得唔好，就會畀人係咁沽，所以唔好再同股票談戀愛喇。
彩兒：點解你又會肯持有資產被低估嘅股份？
梁：資產被低估嘅股份一般冇咩現金流畀管理層攞走，可以等佢被重估。
Kitty：你係點樣發掘呢啲股份出嚟（口架）？
先揀行業再慎篩選
梁：首先就揀出一個行業，再喺入面篩選，唔好睇啲大型嘅股份，因為已經有好多人分析，要揀市值比較細、成交量唔係太高嘅公司。比如揀小型地產股，就要去睇佢持有咩物業，去田土廳確認資料，再去實地考察，比如了解吓個外牆係點，有冇被抵押，有咩原因令個物業估值咁低。另外公司嘅負債要喺合理水平，大股東最好喺董事會。若果大股東唔理間公司，會令我諗背後有咩原因，同擔心有危險。
彩兒：做呢類投資，一般要等幾耐先等到隻股份估值被重估（口架）？
梁：通常一至兩年啦，買入嘅資金比較多嘅話，會即刻被大股東留意到，令佢會買番啲股份走。當隻股份多咗買賣，被其他投資者留意到，佢哋都會跟住買。買呢類股嘅好處係隻股一升可以升三、四倍。
分散投資 按市況調整組合
正所謂「唔好將全部雞蛋放喺同一個籃裏面」，想長期都有穩定回報，分散投資都好重要。理財專家李錦（左圖）就話，投資要分地區、貨幣、市場同產品。
佢話會因應情況調節自己個組合，比如五年前開始睇到美元喺貨幣寬鬆下轉弱，通脹可能會上升，所以就會投資黃金等商品；依家見歐元區唔穩定，有咁多資不抵債嘅情況，所以就減持歐元。佢又話，股票雖然回報可以好好，但持有債券都好重要，因為可以令你有穩定嘅現金流，自己就有買入10年期同30年期嘅債券，仲會持有至到期日添。
若有料報畀彩兒同Kitty或有嘢問，可電郵money.biz@on.cc