北水頭等倉：比電有望突破阻力
上星期四A股突然「走火警」，因為有關註冊制的傳聞而掉頭急挫，惟翌日中證監緊急發出澄清，指中證監從未單獨研究過創業板註冊制，根本不存在三月一日創業板全面停止審核的安排，亦不存在主板、中小板擇期再做安排的問題。
到底係有心人放流料震倉，好為下月指期好倉做安排，抑或真係一場誤會搞到市況咁大波動，要當事人先知道，如今真係得過估字。
既然是一個美麗的誤會，兩地股市上星期五收復失地亦可謂順理成章，恒指急彈475點收場，國企亦收復了8,000點關。
筆者則認為，因應今年市況波動頻密且走勢飄忽，盡量避免持太多短倉，以免進退失據；真係對個股好有信心並作為中長線持有的，就選擇耳根清淨少理市場傳聞及短期市況波動，耐心等候收成。
重點扶持新能源車
本周市場焦點盡在兩會，此前國務院常務會議確定進一步支持新能源車產業的措施，包括加快實現動力電池革命性突破，中央財政採取以獎代補方式對企業給獎勵，加快充電基建、提高城市公共交通、出租車、環生、物流等領域新能源汽車應用比例到五成以上等，並要求有關當局督促落實不得對新能源汽車限行限購的要求，並要破除地方保護。講到咁，新能源汽車股唔升，都對唔住阿爺一片苦心全力栽培。
策略方面，筆者早前已建議低吸比亞迪股份（01211），已上車的投資者可安坐等收成。今日唔爭在睇埋旗下做電池及手機組裝業務的比亞迪電子（00285），上星期股價調整三個交易日後，上周五反彈逾9.4%，收報4.18元，且成交回升，走勢對辦，短線應有勢再試衝4.5至4.6元阻力區，主要支持在3.8元水平。
司慕渢