Market Insight：內房股跌得深可翻兜

股市「熔斷聖手」，前中證監主席肖鋼落鑊興奮唔夠一陣，A股又再打回原形。昨日急瀉，農曆年復市至今升幅一鋪清袋，內地線話近排A股水頭確實無年初咁旺盛，亦有分析話今日上海舉行的G20峰會，可能有針對競爭性貶值，操縱匯率的議題，但橫睇掂睇都唔係理由，底子唔好兼且大媽反應過敏，加加埋埋先可以引爆千四隻A股跌停的悲壯場面。

炒業績冇晒憧憬

近排業績期，已經見係又插唔係又插，對業績有一絲希冀，望超額完成等股價彈番多少，輸少當贏的，都陸續打定輸數。康師傅（00322）昨再插5.4%報7.08元。滙控（00005）及渣打（02888）仲未止瀉，踏入一六年僅僅兩個月，兩股已累積跌22.9%及34.7%。重磅股好似二三線咁隊法，真係輸死人無命賠。

今次中國經濟有幾大鑊，已經唔使花口水多講，自去年中A股政策牛瓜咗，股市救經濟如意算盤打唔響，出口貿易唔得，內需又谷唔起，內地樓市變成誓要力撐的經濟最後防線。北大人望透過財富效應頂住，為人民幣貶值刺激外貿復甦爭取更多時間。

今年以來，中央不斷釋出拯救樓市的信號，本月更調整房地產交易環節契稅及營業稅，粗略統計內地已有超過130個城市出台去庫存新政。綜觀各地出台的去庫存政策，總括可分五類，一是公積金槓桿成重要工具，住房公積金已成為各地去庫存的重要工具；二是降低稅費；三是鼓勵農民進城購房；四是回購商品房作為保障房；五是實施房地產供給側改革。

中海潤地為首選

事實上，樓市在內地固定資產投資擔當着重要角色，內地固定資產投資持續下滑，當然與疲弱的樓市有密切的關係，加上建材、鋼鐵等行業產能過剩仍然存在，若樓市回暖，將有助中央達到去除過剩產能的目標。

然而，昨日有消息指深圳市政府正研究採取措施調控房地產價格，而廣州地稅局則暫延實施「跨區首套」契稅優惠政策，似乎廣州及深圳與中央刺激樓市的政策出現背馳，難免令投資者感到疑惑，內房股昨日跌到一仆一碌。

目前全國46個限購城市，剩低北京、上海、廣州、深圳及三亞依然行緊限購，相對北京及上海，深圳限購條件現時係較為寬鬆，對非本地戶籍人口置房條件，與京滬睇齊唔出奇，惟太大手筆加辣，此情此境，睇怕阿爺都未必肯過佢，假如內房因為消息回落多兩三日，又可以諗諗佢。當然兩隻藍籌內房中國海外（00688）及華潤置地（01109）為首選，始終規模實力有番咁上吓。

昨日收市後，傳來長建（01038）獲加入恒指成分股，取代華潤啤酒（00291）。唔講唔覺，呢個二月長建股價破頂而上，迭創新高，也許已一定程度預先反映咗利好消息，高追可免則免。至於潤啤，業務重組過後，市值規模同交投都今非昔比，被剔出乃在預期之內，相信芬佬亦經已一早做晒嘢，如今正式失落藍籌席位，話唔定股價反而會否極泰來。

舊年聖誕前炒過隻IMAX中國（01970），一出業績嚇到唔少捧場客腳震，去年底止年度蝕1.82億美元，對比前年的2,278萬美元盈利，來回差咗近2億美元。昨股價由開波44.5元殺到落40.7元，之後先見大孖沙逐漸買番上去，收43.9元，跌幅收窄到2.4%，低位計則彈咗7.9%。

IMAX博見底回升

份業績由黑變紅，全因一次過損失，為轉換期權公允價值調整撥咗2.1億美元，唔計呢條數，實際賺4,340萬美元升六成七。再睇去年收入同埋今年預計再增加100塊屏幕的數字，都係高於分析員估計，個市差咗咁耐，難怪人人都好似驚弓鳥，經昨日一插，相信短期低位見咗，由聖誕前高位60元碌落嚟又真係跌到過晒龍，短線先睇佢返衝唔衝破到50元關。

古勝