英國六月會就退出歐盟舉行公投，近期嘅民調講到支持同反對陣營選情緊湊，搞到班投資者標晒汗，鎊匯仲大插水添。不過，原來唔少基金經理根本唔會睇呢啲民調，反而會睇博彩市場，而博彩市場預測英國「留歐」嘅機會率高達近70%，同民調結果好唔同喎。
對於博彩市場預期有近7成機會「留歐」，超過民調顯示比例，有基金經理就解釋，博彩市場先係用真金白銀嚟對政治議題表態，唔係齋噏咁簡單。其實又難怪佢咁講，因為無論係舊年嘅英國大選抑或一四年蘇格蘭獨立公投，博彩市場嘅預測都準確同清晰過民調，原因之一可能係投票意向不停改變，賭仔亦可以相應調整佢哋嘅押注，相反民調就無辦法反映呢種變化。
除咗博彩市場，基金經理會睇埋匯市同投行嘅基金經理調查等數據，先會作投資決定啦。
余絲韻