絲絲講場：創銀梁太有「進步」 唔再戴手帶
創興銀行（01111）副主席兼董事總經理梁高美懿（梁太）之前戴智能手帶計吓自己行咗幾多步，絲絲發現梁太呢排冇再戴，何解？原來梁太已經對自己嘅步數瞭如指掌，「（唔戴）都大概知道行咗幾多步」。
梁太仲話，每日行一萬步最理想，而行樓梯就盡量行上唔行落，避免傷膝頭哥，果然好注重健康。
內地經濟增長持續放緩，但創銀冇有怕，梁太期望今年喺內地開設三間分支，當中打算做內地業務總部嘅廣州分行最快喺下個月開幕，保守估計最少共增聘一百人。香港業務方面，梁太話撇除自然流失後淨額員工人數唔會減少，今年主要增聘前線、後台同合規人員。
未夠秤買銀色債券
梁太孫仔都有兩個，平日以弄孫為樂，大家都好關心創銀未來掌舵人選，佢笑笑口咁話未公布得住，但透露集團有繼任計劃，「唔會令市場Surprise（驚訝）！ 」講起今年新推出嘅銀色債券，梁太竟然一口拒絕認購，點解？原來佢未到法定65歲嘅年齡規定，就仲未夠秤咁話！
余絲韻