北水頭等倉：中旅業務值得憧憬
中證監徇眾要求易帥，滬綜指以高收作回應。舊年A股已搞到中央出手救市，今年初又搞個熔斷爛尾，正常作為部門阿頭，人哋唔郁你自己都要知衰走人。
電動車股有鑊氣
另外，依近期中央思路部署，兩會前股市可望持續回穩，可順勢睇實在港上市的中資股。昨日提及的東風（00489）屬穩陣之選，另電動車股亦有異動，電池股比亞迪電子（00285）、泰坦能源（02188）均升逾一成，早前推介的比亞迪（01211）高見38.45元，一於坐順風車。
此外，留意到紅籌股香港中旅（00308）宣布高層人事變動，原公司主席因須投放更多時間在母公司而辭任，改由公司總經理出任主席。基本上都是原體系內的人事變動，但焦點在於由落手落腳熟悉酒店旅遊等業務運作的高管坐正主席一位，相信有助中旅加快推進「走出去」戰略，會否透過重組，更佳體現旗下酒店資產價值，值得期待。
中旅股價由去年末季高位3.8元水平反覆回落，再次成功考驗2.5元水平承接力。依家環球經濟氣氛唔好，唔多唔少影響到旅遊業景氣。
不過，中旅勝在資產價值尚未完全展現，現價市帳率一倍都冇，截至去年中淨現金32億元，息率有4厘多，相信「十三五」期間內地旅遊板塊點都有番啲嘢睇吓，到時唔會少得中旅一份。
司慕渢