「公職王」鄭慕智一向瓣數多多，做過港交所（00388）政府委任董事、財匯局成員、教育統籌委員會主席、地產代理監管局副主席，最新任務係出任快將成立的保監局主席。
有人質疑佢保險經驗好似唔夠喎？鄭慕智就氣定神閒咁話，自己做咗40幾年律師，其中有十幾年係做訴訟業務，當中有七成或以上案件都係同保險索償有關，同保險業界非常熟落，邊個話佢冇保險經驗的，一定係行外人咁話喎！
佢仲有一個強項，就係習慣「從冇到有」。話說佢做地產代理監管局時，係第一任副主席；做財匯局時係始創成員，兩者都係由零開始；所以財庫局局長陳家強見佢卸任教統會，拿拿臨搵鄭慕智傾吓偈，游說佢接保監局呢個波。