絲絲喺公務員事務局網頁發現一份筍工，就係金融發展局聘請「網頁撰寫員」，月薪109,090元！重點係：一、表面要求唔算高，學士學位OK；二、合約期為6個月（但就竟然有產假、侍產假添！）
金發局呢份「網頁撰寫員」筍工，只須為學士畢業（財務或經濟學優先）、做過金融服務或金融相關傳媒工作至少10年、能在時間緊迫下完成工作、書寫流暢中、英文及操流利粵、英語等。份工做啲乜？就係負責監督及製作金融就業網頁內容，同埋就住網頁技術方面與服務承辦商溝通吓咁。
城中富豪早前請文膽，年薪都有過百萬蚊，不過要求應聘者有20年或以上中文文書工作經驗，精通中文（講明包括古文）、歷史及文化，負責幫管理層寫日常信函、演詞及文書等。至於衞生署請合約醫生，月薪「只有」54,220元！
估唔到金發局出手比頂級富豪仲闊綽！仲以為互聯網世界入面，文字已經唔值錢添，睇到個招聘廣告，絲絲先叫做有番些少安慰。點解絲絲無端端會睇到呢啲？你估吓。
余絲韻