絲絲講場：卓百德父子檔教通「勝」
眨眼就到年初十，仍覺得今年投資冇乜方向？絲絲今年收到星級分析員卓百德嘅賀年卡，入面附帶咗一小篇猴年投資通勝，用五行預測今年投資宜忌。
卓百德係來自新西蘭洋人一名，佢點解曉呢啲？話晒佢喺香港生活咗三十幾年。睇真啲張賀年卡，署名除咗卓百德外，仲有一位叫「卓太馬」？原來佢哋今年父子檔上陣，卓百德位公子Tama Churchouse中文名就係卓太馬。
估今年金價起飛
卓百德今年經已係第二年推出農曆新年投資通勝，今年同阿仔一齊寫，睇睇有乜火花先。佢兩父子講市場同經濟，由五行（五行者，金、木、水、火、土）切入，話強弱情況今年互換。例如屬金與屬水之前都弱勢咗幾年，到今年猴年會雙雙變得最強，所以預計今年金價會起飛；另礦業同埋金屬股今年亦會跑贏大市。咁商品今年是否已經見底？兩位卓大師都未好肯定喎。
屬水行業例如航運、零售、銀行等，猴年都有望脫困做好。不過，屬火行業例如互聯網、電腦、電力、電訊今年或會沉一沉。至於屬木行業如建築、基建、時裝等，今年似乎會下行。
測港經濟較反覆
兩位卓大師話，美國經濟正儲力反彈，歐洲有望慢慢見真復甦，至於香港經濟就有啲反覆（計絲絲話，即是搭飛機遇氣流咁，Chok兩Chok冇事嘅）。佢哋仲話，環球股市年初跌，年尾升，叫大家吼準低買高賣時機。
猴年適唔適合置業呢？兩位卓大師話，買之前要諗清楚有冇能力控制風險。最後佢哋恭喜大家發財、祝大家投資開開心心！
余絲韻