二月十四日係周日兼係情人節，呢啲節日洋人一向好重視。正當大家湧去金鐘排足幾個蛇餅，為求同愛人情人「好朋友」乜都好，喺一片發光白玫瑰花海前面影張Selfie時，作為花海背景見證住N份愛嘅滙豐自己亦相當唔得閒。
事關滙控董事局越洋喺英國忙緊開會，討論究竟好唔好遷冊，個會仲要由日開到夜，足足開到當地時間夜晚10點。
唔知各位滙控董事有冇同啲董事太或Honey們補番數呢？啲董事太同Honey上網見到香港呢邊滙豐前面一雙一對墟冚成咁，唔知有冇詐型呢可。
英國個會開得夜，其實香港呢邊都唔好受。絲絲聽聞，滙豐副主席兼行政總裁王冬勝（Peter）尋日朝5點就要起身睇實咩環境。睇嚟Peter前一晚情人節唔單只要好早瞓，睇怕仲心掛掛添。
余絲韻