孖妹Ｓ檔案：股樓匯輪住震趨吉避凶招財運

避凶：人幣未跌完唔好揸

祝：翱騰投資管理（香港）董事總經理　祝振駒

Kitty：今年金融市場開局奇差，唔講賺錢，先諗吓點樣避凶！香港人Hold住唔少人民幣，但近排人仔匯價係咁跌，咁點算好？

翱騰投資管理祝振駒表示，與人民幣消費者有關的股份不宜沾手。

農銀國際證券林樵基料，人民幣第二季會企穩。

祝：梗係要搵機會轉走佢，嚟緊匯價仲會一路跌，揸住咪盞蝕更多！尤其係香港人唔似得內地人必須揸人仔，點解仲要揸？中央推出眾多政策旨在令佢跌慢啲，但匯價跌勢真係冇得估，外資基金做晒淡倉就當然想佢跌得快，而政府就想佢跌慢啲，大趨勢係跌，全年係跌2%、3%定4%真係冇人知道，估都徙氣。

彩兒：除咗人仔之外，港股愈跌愈平，但所謂賤物鬥窮人，孖妹啲蟹貨有排未見家鄉，都無錢入市買平貨！

短炒股嘥氣 宜離場

祝：股票係好平，但係平唔係一個買入原因囉，一定要有催化劑，好似一啲宏觀事件，例如係中國經濟數據有改善，或者中央推出激烈救市救經濟措施，類似○八年用4萬億（人民幣）救市措施咁，或者要慢慢漚到經濟見底，不過因為○八年一役副作用仲未消除，相信後者機會較大。依家我唔建議散戶短炒，盞嘥時間，最好離場，主因一般人博反彈多數都輸錢，如果係入市綁死咗，唔捨得斬，就講都無謂，我無謂推介股票嚟累人啦。

今年我做投資唔會亂嚟，主要都係穩守突擊，現時我唔睇好香港，反而美國、日本等市場值博率會高啲，雖然呢啲市場都處於調整當中，但相對狀況好過香港，呢啲市場出現反彈時，部分股票會彈得勁啲，甚至有上升勢頭，例如facebook出業績創歷史新高，而Google母公司Alphabet上星期出業績都逆市升，可見好股可以跑贏大市。再者，美國市場選擇多、市場深度足，資金寧選美國都唔揀新興市場；日本市場因應日圓睇跌，所以股市趨升，但受環球市況牽連，加上近期日圓Chok，股市波動性都好大。

Kitty：港股有乜陷阱要避開？

祝：受人民幣貶值影響嘅公司，特別係持有美元債同港元債，而收入係以人民幣為主嘅，如果現時持有就最好沽晒佢；另一類係受中國限制外匯、唔畀人民幣流出所影響，同人民幣消費者有關嘅股份，亦千祈唔好掂，就例如濠賭股、保險股同埋貴價品牌股喇！

彩兒：上星期好多股友見友邦（01299）股價3字頭即時掃貨喎……

祝：咁就死梗啦，依家中央閂閘，限制內地人以銀聯喺香港同其他地區碌卡買保險，每次交易上限係5,000美元（約39,000港元），同之前中央打貪，對濠賭股嘅影響同樣咁大，相信佢會不斷收窄資金流出嘅灰色地帶，估計日後老百姓帶人仔出國消費都一定會被收緊，所以依靠銀聯卡消費嘅公司就會遭殃。

油金難估 美債抗跌

Kitty：其他資產你又點睇呢？

祝：油價走勢受宏觀措施影響，點會估到OPEC（石油輸出國組織）幾時增產或減產啫，貪平入市冇用，油價係見咗底、有起色先會知道谷底過去咗，商品不嬲都難以估計，只可順勢而行。

另外，我都唔睇好金價，主因環球經濟現時面臨嘅係通縮，而唔係通脹，以前有通脹時，先推動投資者買金保值，加上黃金供應量可以好多，開採供應量唔似鑽石咁少。如果想避險，最Work嗰招永遠都係買美國債券，○八年後都離唔開佢，抗跌力強贏通街，雖然十年債券得2厘息，但人跌佢唔跌就贏晒啦，用黃金避險唔Work o架。

慎防大鱷傾巢而出

彩兒：金管局總裁陳德霖話過，如果炒家要拋空港股去推高利率，係要動用以千億計港元嘅「彈藥」喎。

祝：彩兒，依家最緊要持盈保泰，因為都唔知要等幾耐個市先可以見底，連見底未都唔知，都係估估吓咋，最終都係要睇經濟數據有冇改善，仲要暫時都未睇到。啲官話人哋狙擊香港係唔會得手，只係廢話嚟啫，始終經濟一路下滑，啲錢不斷流走，總有弱點畀人攻擊。

佢話炒家要用咁大量嘅彈藥，係冇計及槓桿啫，就當係資金成本抽升喇，啲對沖基金規模係好大（口架）嘛，仲大過香港外匯儲備，你點同人鬥？你諗吓，最大嗰隻，Ray Dalio有成1,200億美元，另外有唔少係200億美元左右，而索羅斯主要係管番家族資產，反而唔大，若然呢班基金同一時間做世界，力量好大（口架）。

趨吉：華經濟料先低後高

林：農銀國際證券董事總經理兼研究部聯席主管　林樵基

Kitty：好多人都諗緊現今大環境下買啲乜嘢先可以印印腳，唔使畀佢嚇到晚晚失眠。

林：估計人民幣首季會維持弱勢，如果揸緊人民幣而又太擔心嘅，都可以轉走佢先，不過個人認為唔需要太悲觀，因為佢十月將會入SDR（特別提款權），屆時會有大需求，近期係人民幣離岸市場成為新戰場先比較波動，相信未來大幅貶值空間唔大，有4厘息袋嘅定存都博得過！今年中國經濟前景會呈先低後高格局，經濟數據舊年第四季先開始改善，大家仲等緊兩會開，估計以上因素要三、四月先反映到，第二季人仔會企番穩。

低吸藍籌 公用股收息

彩兒：我想搵一啲穩陣嘅股份嚟中長線揸，暗瓦底儲番筆用嚟做嫁妝啊。

林：恒指估值吸引，一眾藍籌股股價處於低位，如果係中長線投資者，可考慮藍籌龍頭股，但因油價仍然疲軟，應避開相關股份。因應人民幣同港元匯價持續波動，建議穩健型投資者選擇與中國關連性較低嘅股份，好似香港收租股領展（00823），旗下商場租約收入穩定，股息率不俗；而公用股，好似中電（00002）、電能實業（00006）等，即使一月大市下滑，佢哋抗跌力強，股息又唔錯，值得諗諗。

林：至於認為中國概念股有前途嘅股友，可以注視受惠於兩會推出政策嘅股份，而支持新經濟轉型、冇咁受經濟放緩影響嘅騰訊（00700）可以係首選；另外，中移（00941）受惠4G項目盈利回籠，亦係唔錯嘅選擇。如果係有冒險精神，可以留意舊年跌得較殘嘅內地消費股，例如中國旺旺（00151）同康師傅（00322）等，因應業績基數較低，可以博一博。

大戶造市成本極高

Kitty：孖妹同大家一樣好驚班大鱷，佢哋仲講到明話要狙擊人民幣、港元等亞洲貨幣，但係中國有成3.3萬億美元外儲，想沽冧佢又邊有咁易？

林：咪係！新年流流，唔好睇到咁黑暗先得o架！我睇法傾向正面，人民幣有波幅係正常，但拆息都冇大升，未見有行動喎。對沖基金要做沽空都要成本，香港資金自由流出流入，自動調節機制一向行之有效，有資金流出好正常，到時息口又會拉番高，吸引資金流番入香港。再者，機制安全性喺金融風暴之後強化咗好多，對沖基金想沽空都要用到極高成本，有大量錢先做得，唔係講咁易！我估計係部分投資者係借港幣兌美元嚟炒股，所以旨在放風做低個市，一箭雙雕！

若有料報畀彩兒同Kitty或有嘢問，可電郵money.biz@on.cc

彩兒　Kitty