財金超爸親證 利是管理學

譚朗蔚：儲盈富適時賣

富昌金融研究部總監譚朗蔚（Stevan）的兒子Kayton只有兩歲半，但這位廿四孝爸爸對於如何幫下一代創造財富，已有全盤大計，並坦言希望將來幫他置業。

他指，上年逗得的利是錢高達一萬元，會將部分利是錢買一份禮物給兒子，其餘的存入他的兒童儲蓄戶口做定期。

雖然市場上有不少儲蓄產品，但Stevan指作為貼市的圈內人，會偏好親自為兒子儲盈富基金（02800），並看準時機進出市場，不需要假手於人。「如果要儲股票，我會揀盈富基金，因為佢緊貼大市指數，同埋佢包含一籃子股票，波幅較小。」

蘇沛豐日後會讓囡囡從經驗中學習理財之道。

林家亨直言教囡囡寫揮春難度甚高，最後只好教她向大家拜年。（孫冰玉攝）

然而，他認為港股市場上有太多H股，在中國經濟增長放緩下，大市長遠難以大升，因此「buy and hold」的投資策略現時已不太適用，即使是買盈富基金，都需要「睇位出入」。

有廣告指這個年代供養一個小朋友要400萬元，Stevan說：「囝囝依家讀緊Pre-N（幼兒學前課程），每月學費連雜費要6,000蚊，我讀Degree時都係42,000蚊一年。」

買定物業畀阿仔

他與太太都有一個共同目標，就是能趁後生多買一個物業，留給兒子。「目前嚟講，打工仔一般都負擔唔起，我好難幻想個仔三十歲結婚嘅時候可以買樓。」

他表示，每月都可將自己和太太收入的五分之一儲起，除投資港股及小量衍生工具外，還會買美股及基金。他指美股會集中在科技、醫藥及生物科技，較看好facebook、Tesla及阿里巴巴等，基金則會選美股及歐股基金。

蘇沛豐：儲二百萬 股債7：3

招銀國際証券研究部策略師蘇沛豐（Daniel）剛榮升為父親，女兒未滿月就迎新年，逗到人生第一封利是，他預計女兒每年利是錢約三千多元。

投資期十幾年 勿太博

Daniel又笑言：「利是錢怎夠供書教學呢！」他亦計算過，由囡囡出世至完成大學學位，包括生活費及到外國半工讀等的費用，應該需要約200萬元。Daniel指，「我無諗住幫囡囡買兒童教育基金，我覺得自己投資，啲錢就可以更加靈活調動。」

相比退休儲蓄的投資，Daniel認為供子女讀書更穩健，「如果講退休，至少係20年後的事，就算股票摸頂，都可以等佢谷底反彈；但係阿女去外國升學，只係十幾年後嘅事，嗰啲投資唔可以太博！」

他打算一年後開立新投資戶口，專為女兒未來讀書儲錢。除投資債券外，亦會揀股投資，打算買入較穩陣的股份，包括長和（00001）及領展（00823），他指：「雖然領展會受樓市等外圍因素影響，但走勢較易推測，係長線之選。」

自小教導理財量入為出

他指，若準爸爸媽媽是投資新手，投資資產配置宜均衡，例如30至40%債券，以及60至70%股票，並嚴選低風險股份及低息但信貸評級高的企業債。

Daniel也想女兒明白理財之道，他稱：「會從小灌輸量入為出的理財概念，我諗佢三、四歲就開始識問我攞錢買糖，開頭我會先觀察佢點用錢。如果佢一早將零用錢使晒，咁佢就要試吓無錢使嘅教訓。」

林家亨：吼位掃優質股

恒發金融董事總經理林家亨（Simon）有兒又有女，湊夠「好」字夠溫馨。囡囡今年三歲，囝囝則兩歲，兩個都天真得意，親戚朋友派利是特別鬆手。Simon指，兩人過去平均有四千至五千元，今年利是錢料增至八千元！

囝囝和囡囡每年的利是錢全部存入媽咪的股票戶口，「因為佢哋嘅利是錢唔算多，買大價股有機會一手都買唔到，所以放入媽咪嘅股票戶口一齊投資。」

他指，最近有追入新股智傲控股（08282），呢位超人爸爸的儲錢之道果然與別不同。

壽險年供12萬做基金

另外，Simon眼見港股早前急挫，已有全盤計劃，訂立優質股名單。「因為資金唔係好多，所以決定長揸穩陣的股票，例如中國人壽（02628）跌穿19元、交通銀行（03328）跌到4.5元、騰訊控股（00700）等到120元都會考慮買入。」

Simon亦為子女投資儲蓄人壽保險，各人年供近六萬元。「儲蓄人壽保險當係一個教育基金，去到十八歲的時候，每人可以拎番100萬元，用嚟供佢哋讀大學。」

雖然囝囝囡囡只有兩、三歲，但Simon都不忘灌輸一些理財知識給他們，「佢哋暫時對錢銀都無咩概念，只係知道有錢就可以買嘢。所以平時我會同佢哋唱歌仔，好似以前有銀行的儲蓄歌仔，『小莫小於水滴，漸成大海汪洋』，教佢哋積少成多、儲蓄的概念。」

湊B大考驗 博你畀Like

三位財圈超人爸爸講股自然叻，但原來湊仔都有板有眼！

幫BB沖涼考起蘇沛豐

準爸爸蘇沛豐接受訪問當日，佢嘅寶貝仲未出世。今次佢嘅任務就係幫BB公仔沖涼，要一手包辦除衫、洗頭、沖涼、着衫到換尿片。睇落Daniel無咩訓練過，不過都知道洗完頭要即刻抹乾，先可以沖涼等步驟。就算太太同陪月員唔得閒幫BB沖涼，佢應該都應付到！

教寫揮春難倒林家亨

林家亨嘅考驗就係要教囡囡寫揮春。不過，囡囡仲未識揸硬筆，要佢揸毛筆係幾難。最後Simon惟有捉住佢隻手寫，囡囡中途仲悶到不停打呵欠！佢仲教囡囡讀揮春的恭賀說話。

譚朗蔚要唱歌氹囝囝

譚朗蔚平日開Talk騷，搞Gag之餘又識唱歌，估唔到氹囝囝都有一手。一於要佢同囝囝講故事同唱歌。佢講故事又講得幾生鬼喎，吸引囝囝好留心咁聽。去到唱歌環節，仲成功氹到佢唱咗幾句「Twinkle Twinkle Little Star」。

有片睇：請瀏覽tv.on.cc按財經，睇吓三位超人爸爸教理財，啱睇畀個Like！