絲絲講場：陶冬貼中金融風暴 難逃炒魷最痛
「歷史並不重複，卻有驚人的相似。」咁凝重嘅開場白，唔係絲絲講嘅，係瑞信亞洲區首席經濟學家陶冬講嘅。講緊乜？佢係比較九七年港元被狙擊同今時今日有幾似，仲勾起佢十八年前人生最痛－－就係職業生涯中唯一一次被解僱。
港匯股市受壓似當年
陶冬前日喺自家Blog撰文《港元的歷史輪迴：2016 vs 1997》，指港元最近面對沽空壓力，港股又大跌，同九七亞洲金融危機時相似。
佢話九七年時，啲炒家資金盯中香港聯匯，沽空港股與港元，逼金管局買番港元，夾高銀行拆息，樓市大跌，港股亦冧；結果港府出手干預匯市、捍衞聯匯，仲用外匯儲備買入藍籌股，抽乾市面啲貨，令沽空炒家難以平倉、損手撤退。
不過，佢話當年香港贏得實情有啲僥倖，事關當時俄羅斯資本管制，揸緊俄債嘅炒家唔夠流動資金，先至顧唔掂港元條戰線。
長遠掛鈎人幣合邏輯
佢又講到比較敏感嘅聯匯問題，仲話長遠睇，港元與人民幣掛鈎更合乎邏輯。
點知去到文尾，佢忽然感慨，話自己團隊當年成功預言咗亞洲金融危機，但成個Team結果成為金融危機嘅犧牲者，個Team所在嗰間公司九八年關閉，嗰次仲係佢職業生涯中唯一一次被解僱。
人生最痛有幾痛？佢話「慘痛記憶猶新」。件事都過咗十八年，但似乎佢今時今日仲好耿耿於懷。臨尾佢仲好擔憂咁話「覆巢之下安有完卵」，絲絲好似覺得寒寒哋。
余絲韻