滬綜指昨失守2,700點收市，浸浸落踏入無底洞！其實，官方話嚟緊經濟係L型走勢，但到底離那個「L」底有多遠，先至係投資者最關心問題。今年一月開個頭差成咁，首季經濟數據睇怕都幾驚嚇。股市通常走先經濟六個月，眼前跌市正反映悲觀經濟前景。
近期魚缸熱門話題不外乎係國際金融大鱷已屯重兵做空中、港股、匯，其實一點也不出奇，皆因班大鱷們虎視眈眈中國已有好幾年，終於等到出手機會。不過，呢個行徑無異於挑戰當今中國政權，成功的概率唔高；真係成功的話，唔單只中國，睇怕全世界都唔會有好日子過！
雖則國家主席習近平話，中國呢場新革命係「開弓沒有回頭箭」，但筆者認為，若然金融危機足以影響到社會穩定，中國應考慮放慢人民幣國際化步伐，先穩定內部環境，以換取時間推展內部經濟結構改革，打好基礎再上路，這既可免成大鱷囊中物，亦沒有放棄改革的初衷。畢竟國策亦要因時制宜，外圍因素變化（尤指西方及中東國家控制的油價）實非中國可以控制，為今次計係控制好可以控制的內部因素，全力避免硬着陸。
回說個股，近月陸續有二、三線股宣布合股供股，昨日更見到有股仔跳崖式急挫而停牌，顯見今次跌市進入另一階段。
事實上，預期淡市要維持一段時間的話，無論係實力紅色莊家，抑或係本地老牌莊家，都唔會做善事力頂股價，反而是踩多腳又或者供供合合將貨源回收。炒得細價股，就要預咗抵得渴。
大價基金股亦唔好得幾多，好似隻體品股安踏體育（02020），去年股價大幅跑贏大市及同業，皆因基金成功圍飛，隻股好乾身。踏入新一年，基金組合洗牌，沽高估值股份套現吸優質平貨係正路做法。
安踏股價在去年末季高見24.45元後，終於不敵地心吸力，前日股價一度低見16.22元，昨日反彈上18.04元。若今轉反彈未能收復250日線18.58元，相信股價繼續試低的機會甚大。有貨宜趁反彈減磅，冇貨亦無謂手多。若掉頭再插穿16元的話，等見番去年初13元水平先至再睇番都未遲。
司慕渢