Market Insight：基建股短線博反彈

美國加息步伐可能放慢，對亞洲新興市場難得的喘息機會，昨日除了A股以及日股之外，亞太區股市普遍都有進帳，港股亦無跟美股走，期指結算日，恒指高開41點後表現反覆，最多升過171點，埋單升143點收報19,195點，成交唔搶眼，主板得754億元。

巨熊出沒已接近三季，唔少二三線股早就跌到殘，唯獨今浪罕見的二三線斬倉潮，居然喺昨日升市下由恒發洋參（00911）揭開序幕，股價一開就瀉，十點半拉閘前累跌91%或0.361元，得番0.034元。缸邊傳言四起，但確實原因有待公司通告。

玩股仔可免則免

咁啱古勝上周與一班中資行大班飯敍，講起有唔少中資客喺舊年港股大時代期間落嚟炒股，雖則股票方面都跟足規矩，按得極低成數，但個市陰陰乾大半年，唔少二三線高位唔見七至八成，去到孖展客差不多蝕入肉的邊緣。

證券行唔推部狗頭鍘出嚟，純粹響應國家隊維穩呼籲。不過，見到恒發洋參昨日個勢，加埋老友們言之鑿鑿，短期即使想博反彈撈貨，都係揀番啲成交夠的大球場去博，嗰啲靜得緊要，兼且一日得三、兩球錢成交的股仔，都係免得過就免。

到底因為期指結算，純托指數，抑或恒發洋參的暴瀉影響？即使升市，下跌股份仍超過800隻，比上升股份大約600隻要多，在下昨日揀隻中國太保（02601），跑贏國壽（02628）、平保（02318）及新華保險（01336），升2.9%順利突破10日線，技術走勢好轉，短線先睇28.3元。

早排在下講過，在去庫存去產能的大趨勢下，即使反彈，可以唔使睇舊經濟股，疊埋心水專攻TMT等新經濟故事，其中醫療保健類股票，本來應列入中國經濟新希望裏面，惟政策風險實在難料。最佳例子有阿里健康（00241），昨日忽然狂插兩成，公司照例話不明跌因。

政策風險難防備

據內地媒體報道，因為內地藥廠唔滿意國家「全國藥品電子監管網」被壟斷，準備向相關部門及阿里健康興訴訟，報道指國家食藥監總局副局長孫咸澤，與藥廠開會後曾揚言收回阿里健康的藥品電子監管系統的營運權。由於會面屬非公開，消息真假難料，假如屬實，投資者自然會聯想到，當局想息事寧人，抑或一個副局長真的可以說了算，話收就收。

作為魚缸局外人，只能夠睇住二手資料去估。睇番阿里健康，現價同舊年港股大時代高峰時14.32元比，跌到四分一都唔夠，同舊年十一月反彈高位6.6元，都做緊五折大酬賓，得返3.34元。財雄勢大如阿里巴巴，搞網上藥店都可以搞到一鑊粥，仲講乜「互聯網+」，以電子商貿帶動舊經濟，新舊結合令產業整合提速。今次故事教訓，炒內地政策，信十足隨時可以輸八成。

基建股去年一度是投資者寵兒，在「一帶一路」國策概念下，基建鐵路股是去年港股大時代率先開車的板塊，但之後股價亦隨大市回軟，股價更屢創新低，中國中鐵（00390）及中鐵建（01186）較一年高位已回落約六成，跌幅相當驚人。

鐵路項目有保證

據內地媒體引述國務院發展研究中心指，「十三五」仍須深化推進鐵路改革，考慮推進「客貨分開」、「競爭性業務和非競爭性業務分開」、「網運分開」，全面引入競爭，推進行業重組，形成統一開發、競爭有序的鐵路運輸市場。在憧憬受惠鐵路改革之下，基建鐵路股近日由低位反彈，而昨日升幅更加顯著，其中以中鐵表現最突出，全日升6.83%，中鐵建及中交建（01800）分別升5.2%及2.6%。

內地經濟疲弱，相信增加基建投資仍是中央刺激經濟的重要政策，據悉鐵路「十三五」規劃期間，全國新建鐵路不低於2.3萬公里，總投資不低於2.8萬億元人民幣。

雖然工程項目眾多，但工程項目毛利率始終是市場所關注焦點，負債高企亦增添基建股的不明朗因素，所以即使有國策配合，股價無大起色，近日雖有反彈，但相信升勢難持久，故只宜投機買入博反彈。

古勝