絲絲講場：推盤鬥誇：新地谷峻巒辣跑3分鐘
不夠爆炸，怎麼有話題。絲絲尋日睇住新地（00016）為要證實，旗下元朗錦田北峻巒發展項目有幾咁近西鐵元朗站，佢哋出動到一架火紅色嘅林寶堅尼，即場試畀全人類睇。辣！
新地副董事總經理雷霆尋日特登安排咗架火辣林寶堅尼做實驗，配合先進科技，即場向傳媒直播呢架辣跑同屋苑小巴，由樓盤出發去到毗鄰西鐵站嘅YOHO MALL過程。今次測試雖然用咗超級跑車，但全程其實維持安全車速行駛，就算中途遇到少少燈位阻延，車程都只係3分36秒！
仲有，新地今次同林寶堅尼合作，嚟緊周末同下個月十三、十四日，喺樓盤現場舉行林寶堅尼車展。
雷霆又話，峻巒發展項目第1A期至今已經賣咗超過180伙，套現逾11億元；日前原價加推新一批單位，周六將發售其中12伙；而項目1B期將於農曆新年後開售，有機會與同系元朗映御同步登場。
桃紅Gentle民晒恒地樓
像突然地，任何地方也像開四面台，絲絲尋日仲見到「桃紅Pink Gentle民」。
話說，恒地（00012）營業（一）部尋日傳媒團年午宴，總結舊年賣樓成績同預告今年推盤大計，恒地營業（一）部總經理林達民率領部門一眾猛男高層，全套桃紅色西裝、桃紅呔出場，一字排開，五個桃紅男，Shocking pink for real！
余絲韻