絲絲講場：里昂風水測市 猴年仲Chok
預測股市、樓市走勢，走唔甩睇圖表、睇成交、睇價格數據；咁風水術數，你又點睇？中信里昂證券剛發表咗二○一六猴年風水指數，話猴年港股走勢反覆，貫徹靈猴好動性格，仲話恒指三月見頂、六月落谷底，七月同十一月又反彈番，似過山車。
三月見頂 六月最凶
中信里昂話嚟緊係火猴年，恒指一開局會似猴仔咁爬上頂。中信里昂科技行業分析師馬卓藍話，預測三月十四日同三月二十三日係升市「吉日」，之不過轉頭就倒跌，六月將會全年表現最差，「凶日」就係六月二十一同二十四日。七月同十一月會稍為反彈，「吉日」係七月十四日、二十六日、二十七日，同埋十一月二十二日。（已經幫你Mark低晒啲日子喇，睇右下角張圖）
「金」「土」行業有運行
咁板塊方面又點？屬「金」行業最好景，例如黃金、白銀、汽車、金融，來年大部分時間表現都唔錯；屬「土」行業，例如建造業、內房、再生能源都有望向好。
至於油氣、公用事業、科技、電訊同互聯網板塊，雖然開年勢頭好，但第四季會急轉直下。至於屬「水」行業雖然年初發力走強，但全年都唔太睇好，屬「水」嘅包括博彩、交通運輸同機械。
正南方樓價閉翳
至於大家都關心嘅地產風水，中信里昂話，猴年全港最佳方位係正東同正西方，即是柴灣、堅尼地城等地區樓價有望跑贏大市；流年不利方位係東北同正南，正南更加係流年三煞位，咁鰂魚涌、香港仔等地區就……信嘅就避吓好。
屬牛同蛇最當旺
十二生肖當中，屬牛同屬蛇朋友今年運勢較佳；屬雞嘅運程麻麻；其餘生肖中規中矩。咦，大鱷索羅斯屬馬，佢今年會否成功沽空亞洲貨幣呢？馬卓藍話，屬馬者今年運程一般，要視乎索羅斯能唔能夠睇準入市。
都係嗰句，風水術數並非精密科學，信不信由你。至於絲絲呢，就梗係……
余絲韻