21歲成功買樓做「宅」男
香港居住環境狹窄，很多年輕人都想盡快逃離家庭蝸居，改善生活，21歲的姚子峯（Donald）為求有私人空間，不惜搏盡搵錢，冀承做九成按揭上車。即使銀行未必批足九成按揭，其父母亦願助他圓上車夢。
Donald生於小康之家，與父母及姐姐同住在實用面積400方呎的兩房單位，看似沒有問題，但二十一年來要與姐姐同房，缺乏私人空間，難免令他想早日買樓。「由畢業出嚟做嘢開始，就一直想買樓，因為想有私人生活空間，所以兩年幾都好努力搵錢，為圓上車夢。」
夢想看似不切實際，但Donald的夢想卻非常實際。「一直想擁有個人物業，覺得買樓應該愈早愈好，之後嘅資產點樣分配都會順暢啲。」為做「宅」男，Donald中學時已經開始打工，「中學時期兼職做過廚房、搬運、樓面侍應等，平均一個月賺5,000多元，扣除使費每個月都儲近3,000元。」
投身代理勤搵客開單
中學畢業後，他決定投身物業代理，展開「搏盡」搵錢大計。「我唔甘心打政府工，只得穩定收入，想搵多啲錢，所以做靠自己努力去搵多啲錢嘅工。因物業代理係自己搵自己食，所以我會特別勤力，每日必定會打電話搵客、接客，我係分行入面打電話最多嘅代理，每日最少打50個。見客可能人哋做10次，我就做20次，做多啲，開單賺錢嘅機會就大啲。」
為搵錢，Donald曾放棄與母親慶祝母親節，「我之前帶過客人睇洋房，但無買到。之後同佢保持聯絡，兩個月後成功再約佢出嚟睇樓。嗰日係母親節，我帶齊唔同樓盤嘅資料上佢屋企介紹，最終客人被我嘅誠意打動，同我出去睇樓，仲即日成交咗。」Donald屢敗屢戰的精神，令他一度成為公司的「最佳新人王」及「成交單數最多新人王」。短短兩年半的代理生涯，他平均月薪增至逾3萬元，並月儲收入的三分之二。
儲40萬首期平購碧湖
近期本港樓市開始調整，上車機會突然出現。Donald辛辛苦苦儲了逾40萬元首期，決定買入粉嶺碧湖花園六座中層F室的單位，實用面積400方呎，成交價290萬元，實用呎價7,250元。當時，單位成交價較屋苑同類型的低近一成，重返一四年八月的價錢，他可說是平執筍盤。
該單位屬兩房間隔，雖然景觀主要為樓景，而且客廳為鑽石形，惟價錢低於三球，一心上車的Donald決定搏盡買入。「見到樓價開始跌，一直留意有無上車盤。機緣巧合下見到碧湖兩房單位，售價、環境、間隔都合乎自己心意，上樓睇完就即日決定買。」他稱，雖然首期不太多，但計算後，若做足九成按揭是可以上車的。
首期緊絀 或需援手
但他任職地產代理，收入不穩，恐銀行未能批足九成按揭。「依家仲審核緊，父親願意做我嘅擔保人，希望可以借足九成。不過，如果真係批唔足，家人都願意借錢畀我買樓。」他直言，自己只有約40萬元上車，支付29萬元首期、律師費、佣金等，不足以承做八成按揭。
Donald深知自己處於水深火熱，面對樓價下跌風險、加息供樓壓力、向父母借錢等問題，但仍堅持買樓，「樓價唔到我控制，自己有買樓需要，儲到錢又遇到心儀單位，所以決定買。希望可按到九成，供三十年，咁就輕鬆啲。買到樓後會更加努力搵錢，新目標係年薪過200萬元。」