絲絲講場：海爾標誌早打入國際
海爾要走出去，早前宣布以54億美元（約421億港元）收購通用電器（GEC），想要打入國際市場。但查實海爾品牌標誌嗰對「海爾兄弟」更早已經「走出去」，打入咗國際同志界，被人當咗做同志Icon。
呢對「海爾兄弟」，絲絲聽聞深色頭髮係華人阿哥「琴島」（即是青島別名），金色頭髮係德國細佬「利勃海爾」。呢兩兄弟，以前會喺海爾雪櫃上見到，仲會喺內地卡通片睇到。點解又中又德？聽講海爾上世紀80年代剛起步時，雪櫃技術係由德國引入。
兄弟傳將重現江湖
但估唔到，佢哋成為咗「兄弟情深」嘅Icon。唔信？你試吓喺搜尋器打「海爾兄弟」同「腐」字，就知佢哋地位同Tom of Finland有得揮（係乜人？自己上網查，總之重口味）。
「海爾兄弟」依家已經冇再喺海爾雪櫃或網站出現，但有消息話海爾打算畀兩兄弟獨立，「走出去」喺手機遊戲或新卡通同大家見面喎。
余絲韻