絲絲講場：港人上網最鍾意Hea
香港乜人最感覺唔到幸福？係中年人。
保險公司信諾做咗個身心健康調查，話中年人嘅幸福感比後生仔低；而年齡介乎30至49歲嘅受訪港人，有三分一話完全冇可傾訴對象，而當中超過七成人竟然係結咗婚！噢。
平均每周花48粒鐘
算吧，最緊要係仔女。調查都係咁話，有七成幾港人都認為照顧子女嘅經濟需要十分咁重要，不過只得四成左右認為自己呢方面做得好。咁其餘嗰六成……
連老公老婆都傾唔到偈，但就有五分一人話唔可以冇咗個智能電話！不過睇嚟電話未必用嚟講，而係用嚟上網。調查話港人平均每周花48粒鐘上網，做啲乜？花得最多時間係上網Hea，其餘依次係玩fb、電郵、睇YouTube、打機、網購。
咁搞法，幾時得嚟老。查實點先算「老」？調查話，西歐人士認為未到67歲未算老；亞洲人58至64歲就叫老；香港呢，66歲先算老。希望你仲夠時間尋回幸福。
余絲韻