絲絲講場：霆鋒風騷撈埋翻譯

就咁嘅，謝霆鋒二○一四年賣咗自己間後期製作公司Lucrative Skill六成股權畀漢傳媒（00491）做埋漢傳媒大股東，上周霆鋒再同漢傳媒將共85%Lucrative Skill股權賣畀數字王國（00547），數字王國尋日開記招，話收購後搵埋霆鋒做數字王國嘅大中華區揸Fit人，計劃打入內地市場，進軍虛擬實境（Virtual Reality）和360度全景拍攝。

晒兩文三語

數字王國有幫《鐵達尼號》、《變形金剛》等荷里活大片做視覺特效，今次單Deal涉及1.35億元，霆鋒尋日何止現身記招，做晒埋兩文三語，照顧埋在場洋人高層，連MC方健儀都話多謝晒佢做埋翻譯。

霆鋒先係廣東話開場，話自己好細個就愛上電影，好鍾意睇戲拍戲乜乜乜。雖然食過唔少山珍海味，但佢話最愛竟然係片場派嘅飯盒，連佢啲朋友都話佢黐線，不過佢話「That's where I came from 」。

送自家曲奇

講到後期製作行業發展，霆鋒即轉普通話Channel，佢話無論電影、電視、巴士站廣告都要用到後期製作，「這個世界變得都是後期、都是Digital」。佢唔只識講、識食、仲好識做，送埋自家製鋒味曲奇畀大家。

同場仲有兩隻豬：麥嘜同麥兜。數字王國行政總裁謝安話，之後會幫佢哋製作虛擬實境短片，由佢哋帶大家周圍「遊覽」。具體內容同形式？唔講得住喎。

余絲韻