Market Insight：保留現金等執平貨

隔晚有外電報道，久聞樓梯響的巴克萊新一輪裁員傳聞即將殺到埋身，唔單只把亞洲成檔投行生意關掉，受影響仲包括紐約、倫敦，甚至要削減及延發花紅。

早兩星期，古勝經已收到路邊社消息，話傳巴克萊關閉本地證券部門，本月中打後所有非交易路演全部叫停，已聞到些少魷魚味，睇嚟消息真確度無十足都中九成，又一間曾雄心壯志，睇好大中華故事而喺香港大展拳腳的投行講拜拜，確實唏噓。面對全球經濟低迷，歐美國家三不五時向銀行業開刀罰錢，生意僧多粥少的投資銀行，確實唔係好多股民想像般咁好環境。

疊水一族尋求出路

話說回頭，昨日有歐資私人銀行喺香港開投資研討講座，呢類私人銀行客戶，講緊入場費至少都三球美金，居然有數千人出席，賓墟咁場面，只可以話，香港疊水之士的確何奇多，私人財富管理市場好可能會係整個金融板塊中最後一片樂土。

講開又講，講座咁旺場，多少亦同近半年市況動盪，股、匯、樓、債樣樣得番半條人命，有銀人士對住個市，都同樣摸不着頭腦，睇睇可唔可以發掘一些一六年投資idea。

一月中，美銀美林一項環球基金經理調查，受業績預測下滑，以及增長前景放緩所困擾，大孖沙手頭現金比例升至5.4%，是○九年以來第三高水平。芬佬投資第一條格言是「不明朗揸現金」，高現金比例揭示個個要錢唔要貨的事實，但也往往是市況即將見底先兆。

可惜的是，另一個寒暑表，目前僅12%芬佬預示未來一年環球會陷入衰退，同上次金融海嘯引發環球股災時去到五成幾相比，仲有好一段距離。

當然，調查訪問的是環球資產管理團隊，中港股市的跌浪比外圍更早的發生，或者我哋好大機會亦比外圍見到今浪的浪底，假如用股市市盈率與市帳率一類傳統方式去評估，不到萬九點的港股應該離底唔遠，包括古勝在內，唔少人都等緊終極的恐慌跌市出現。

熊市撈股唔殘唔買

在下相信，現時更多看官會問，邊一類股票可以喺撈底時優先考慮？老實講，熊市之中一定唔殘唔買，可惜最殘的板塊，都集是中國產業轉型，服務業逐步取替製造業的趨勢下，佔經濟重要性愈來愈低的犧牲者，好似資源、重工業、金屬企業一類值博率實在不足；反之，互聯網、電訊、電子商貿等一類前景比較好的，就明顯未夠殘。

唔信可以睇睇，今浪國指從高峰掟咗近半落嚟，騰訊（00700）由大時代高位170元，只係跌咗兩成二，美國上市的京東（JD）都只係跌到三成，話殘未算十分殘，係可買，但又唔係可以一注獨贏，買落去安枕無憂嗰隻。

港匯經過一輪下跌後，昨日一度回升，大市亦一度作出反彈，但升勢最終無以為繼，而本地地產股繼續成為重災區，昨日恒地（00012）、新地（00016）、新世界（00017）及信置（00083）等均創出一年新低。

近日港匯疲弱，加快資金撤出港元資產步伐，本來市場預期港匯要跌至7.85，銀行體糸結餘有所流走才有加息空間，市場普遍預期此情況最快要第四季才會出現，但近日資金流走速度之快，港匯跌勢之急，實在令市場擔心在市場缺乏資金下，香港被迫提早加息。

大環境利淡地產股

對於近日開始走下坡的樓市而言，若然香港提早加息，肯定是雪上加霜。加息定會加重買樓人士的供樓負擔，令購買意欲下降，加上在疲弱的經濟下，失業率有機會上升，令市場需求下降，在雙重因素夾擊之下，本港樓市肯定無運行，劈價潮勢必持續，本地地產股表現疲弱當然可以理解。

瑞銀根據過往紀錄顯示，在港元M2供應與住宅樓價關係密切，M2供應減少將令本港樓價進一步受壓。本港樓價○八年以來攀升，現時資金流向逆轉，可能令樓價加速下滑，而瑞銀估計宏觀不利因素將令樓價由現時至一七年底再跌20至25%，因此維持本地發展商「減持」評級。

地產股在樓價跌勢未止之下，股價肯定低處未算低，在下認為現階段入市撈底買本地地產股是相當不智。

古勝