港匯波動，港股昨日嘔凸前日升幅，恒指失守19,000點關，最低見18,833點，成交更放大至922億元，果然呢次跌市進入戲肉了。勢估唔到今次跌浪來得咁快，由匯市波動拖累股、樓跟跌，見到期指未平倉合約，依家高達10萬張，睇嚟淡友點都要嚟一次Jetpot，先至肯收手。
人民幣匯率波動，最終還是燒到港匯身上。IMF重申繼續支持香港聯匯制度，但聯匯猶如雙刃劍，繼續落去對香港經濟有損無益！今年股、樓開局不順，為今之計係要忍，保留實力，若要維持部分資金在魚缸內，宜盡量從防守性股份入手，勝在有得守。
昨日提及的中移（00941），收市險守80元關，跌幅係三大電訊股中最細。呢啲市人心虛怯，股票幾有實力都好，跌起嚟都可以無譜。不過，站在中長線，呢啲場面往往係良佳的入市機會。實力投資者手持現金不用慌，耐心睇準時機，今年食粥食飯，可能就睇農曆新年前呢轉跌市有冇好好把握。
避重就輕，選股繼續要重視業務性質及現金流表現，以策萬全。粵海投資（00270）逾半收入來自供水及電力業務，理論上收益基礎相對穩陣。見到本月以來價由11元水平反覆回落至9.5元水平，現時14日RSI處33。
若短線恒指下試18,500點支持，呢浪粵投若進入超賣區，有機會喺8.5元樓下畀位大家上車，呢個位相等於一六年度預測市盈率12倍，息率3.6厘，中長線有得諗，可密切留意。
司慕渢