Market Insight：淡友主導 無謂估底

今趟港股杰撻撻，毫無疑問同A股去年下半年開始，阿爺無論救市與穩定措施上好心做壞事有關。股票之道，有人真金白銀用錢換取一堆公仔紙，全憑一個信字，睇見政策朝令夕改，畀着邊個手上有國企及中資股，都無不掟貨走人。

今浪國指於半年多啲啲時間，可以蒸發四成七，假如以高位回落兩成叫步入熊市，以股災形容國企都真係唔到肉，直頭同歲晚大平賣無分別。

昨日所見，藍籌股中以地產股隊得最恒。而偏重中資成分的股份，唔少芬佬早就減得就減，手上仲有貨可沽的，唔少都係業務主要集中香港及海外，尤其○七年開始，已經與樓價背馳的本地地產股，淡友出動到挾息為這類息口敏感股來個大屠殺，睇到長實地產（01113）、新地（00016）及信置（00083）息率去到4至5厘都要殺落嚟，真係無話可說。

港匯一石激起巨浪

有番咁上下股齡的人士，可能仲會對港府九七年捍衞聯匯，挾息擊退炒家但引發股災樓災有一點點印象。其實以衍生工具賭港匯插水成本好低，反觀依家期指及國期未平倉合約的規模之大，的確是相當誘人的刀仔鋸大樹玩法，尤其經歷一五年中港股市跌到一仆一碌，股市信心蕩然無存之際，在港匯隨手丟塊石春，淡友經已足夠令魚缸掀起滔天巨浪。

近期愈來愈多中資外資分析，對中港股市及人民幣匯價發表相對「溫和」之預測，是發自內心抑或其他原因促使？在下不便亂猜，從市場反應，分析歸分析，市場覓食者卻向着樂觀的另一方向操作。睇番港美元一個月同業拆息，舊年年底息差仲有0.208厘，連續多日港匯插水，息差已收窄到0.116厘，仲可以挾到幾窄？可唔可以逼到銀行提早加息？古勝都好想知答案。

要睇實未平倉合約

不過，睇番一一年八月，當時歐債危機蔓延，對中國經濟的憂慮，港股、港匯曾經成為炒家ATM，港匯當時殺到落7.8113，兩萬五點三頂不破的恒指，最終要跌到落16,170點先見底，累積跌逾三成。

今次港匯跌勢更勝當年，短短大半個月由強方兌換殺到連7.82都穿埋，會唔會玩大佢，落埋去7.85弱方兌換保證，製造股市更大恐慌？話事權喺炒家手上，今浪由大時代高位計，恒指累跌近9,700點或34%，同一一年相比其實已相差無幾，但論到夠皮未？似乎要留意番近排跌市，一直高企的恒期、國期未平倉合約，尤其後者肯唔肯回落，啟示作用更大。

日前講過，中國大媽買乜輸乜，而「中國大媽」這稱號源於一三年來香港搶金慘痛一役，據估計，至今帳面虧損約160億元人仔。不過，金價近期卻絕對不弱，相對油價更跑贏幾條街。

金礦股有機會突圍

對於中國大媽而言，黃金重新具吸引力，基於投資渠道狹窄，買港股股匯齊蝕，買QDII保本基金很快已賣斷市，且政府為怕走資也不願提高QDII額度。因此，黃金作為另類國際貨幣再度金光閃閃，會否再出現另一次搶金潮？當然睇人仔是否持續貶值，逆市買一些周大福（01929）或六福（00590）可能有意想不到的收穫。

買金礦股更是正路之選，金價近期堅挺，但金礦股卻隨大市下跌，紫金（02899）今年累跌11.8%。金價與國際並軌，不受人仔貶值影響，以人仔為單位的業績更可受惠，而公司借貸亦是人仔。買金冇息收，所以最怕加息，但在近期金融冷風吹下，市場預期下次美國加息最快也在九、十月間，明年甚至可能掉頭加息，十年期美國國債孳息已跌至兩厘，若要賭金價回升，可買紫金或中國黃金（02099）。

古勝