絲絲講場：李建英變身金管「推銷員」

金管局金融基建助理總裁李建英（Esmond）今年八月就退下火線退休，不過佢對金管局仲非常咁上心、十分之肉緊。Esmond尋日出席銀通P2P過數服務記者會，都不忘自讚金管局有份搞嘅電子支票，每讚銀通P2P一句，就補多句電子支票有咩好，總之把握機會勁Sell上個月推出嘅電子支票。

Esmond仲唔係得個講字，佢仲準備埋證據來說服大家。佢話電子支票平均每筆過萬蚊，同銀通P2P嘅兩日最多三千蚊，明顯Market（市場）唔同，所以兩者無競爭，各有各做，仲話香港支付市場大把空間發展咁話。

講講下，佢仲順手幫金管局高層專欄《匯思》賣埋廣告，話下期就係正正講流動支付嘅保安！咁上心咁全方位包圍，絲絲佩服。

余絲韻