絲絲講場：醒你十招 30歲致富

一、儲錢投資 滾大本金

儲錢唯一原因係用來投資，而非為儲而儲。緊記將非緊急錢擺喺投資戶口，每年至少檢討該戶口兩次。

二、搵有錢人做你師傅

要突破基層眼界局限，就要靠學，搵啲成功有錢人做自己師傅。邊度搵？東網《致富智庫》任你睇。

三、借得其所 加大籌碼

借錢並非大忌，有錢人就係懂得利用借貸來玩槓桿，加大賺錢籌碼。窮人借錢享受，富人借錢再搵錢。

四、你不理財 財不理你

要將錢當係會呷醋嘅男友女友，你着緊佢，佢先會着緊你；你對佢冷淡，佢亦唔會對你熱情。

五、天道酬勤 肯捱肯做

人人7點收舖，你肯做到11點，肯定多啲生意。勤力，你實做得到兼包有回報，正所謂「天道酬勤」。

六、「天生窮」唔係藉口

微軟創辦人蓋茨講過：「如果出身貧苦，唔係你嘅錯；但如果你死於貧窮，咁就一定係你自己嘅錯。」

七、唔使炫耀 學慳字訣

成功人士係直至生意或投資帶來多元化收入後，先會「獎勵」自己。「慳字訣」係你必須要培養的。

Starman

黃安盈

八、錢做槓桿 錢再搵錢

做有錢人，要識玩槓桿，即係投資。唔好淨諗住靠份人工，唔好諗住靠儲。買股票、買樓收租都係投資。

九、訂高目標 走得愈遠

想得太細會限制你嘅機會與發揮。目標不妨Set高啲，呢個世界多的是錢，缺嘅係敢有大想頭嘅人。

十、追住啲錢 增加收入

第一步要追住啲錢，成功人士往往係及早追住啲錢，只要不斷諗住要為財富增值，錢就會引領你。

成功例子一：多類型投資免收入單一

80後人氣Blogger Starman早年投資工廈，30歲前已經賺咗人生第一桶金。依家財務自由，每月坐喺度收息都有6位數字。

Starman指儲蓄會被通脹蠶食，且若收入來源單一，財富易受經濟環境影響，「以做銷售員為例，零售市道轉差，或要減薪或裁員。」所以打工仔應作多類型投資，以賺取被動收入，兼分散收入來源。

佢話，初入職場屬投資期，投資在自己身上，累積工作經驗、建立人際網絡好重要，切忌怕蝕底。佢自己當年初畢業時亦超刻苦，試過一日連做20小時，返屋企小睡一下就返公司搏殺。基層家庭出身的Starman亦話香港機會處處，出身貧窮唔代表冇機會。

成功例子二：首重訂立累積財富目標

中原資產管理高級副總裁黃安盈（Kristy）30歲前已成功累積第一桶金。Kristy話經濟差，有機會失業，「所以千祈唔好一世靠份工，創業唔多人做到，但儲錢做投資相對易。」初出社會工作5至7年慳住使，之後投資彈性會大好多。佢建議將月薪平均分三份：一份做日常使費、一份存銀行應急、一份做長期不動產。

「世界上咁多人，點解得一小撮可以成為富豪？首要係有累積財富嘅目標」，Kristy認為目標一千萬好合理，因期間要面對貶值問題。「又不妨試諗吓，十年後想住邊類單位？1,000呎私樓定獨立屋？並以此為目標。」而心態與堅持同樣重要；啲只識吃喝玩樂嘅朋友，不如割席，要為遠大目標狠下心腸。

余絲韻